Azərbaycan İslam Partiyasının (AİP) sədri Hacı Mövsüm Səmədov barəsində çıxarılan həbs qərarından apellyasiya şikayəti verilib. M.Səmədovun vəkili Anar Qasımov APA-ya deyib ki, müdafiə etdiyi şəxs apellyasiya şikayətində Nəsimi Rayonu Məhkəməsinin barəsində çıxardığı həbs-qətimkan tədbirinin ləğv olunmasını və məhkəmənin hökmünə qədər sərbəst buraxılmasını istəyib.

Bakı Apellyasiya Məhkəməsində apellyasiya şikayəti üzrə məhkəmə iclasının vaxtı isə hələlik müəyyənləşməyib.

Xatırladaq ki, Nəsimi Rayonu Məhkəməsinin qərarı ilə M.Səmədov barəsində 3 aylıq həbs-qətimkan tədbiri seçilib. M.Səmədov Azərbaycan Cinayət Məcəlləsinin 28, 214.2.1-ci, 28, 214.2.3-cü, 228.3-cü, 278-ci maddələr üzrə ittiham olunub.

Xatırladaq ki, yanvarın 7-də AİP sədri Hacı Mövsüm Səmədovla birgə saxlanılaraq, inzibati cəza alan şəxslərdən iki nəfəri - Mirhüseyn Kazımov və Elçin Həsənov isə yanvarın 18-də sərbəst buraxılıb, M.Səmədovun əmisi oğlu Dəyanət Ələsgər oğlu Səmədov barəsində isə Cinayət Məcəlləsinin 228.1 maddəsi ilə 2 ay müddətinə həbs-qətimkan tədbiri seçilib.

Partiya sədrinin təşkilatı məsələlər üzrə müavini Hacı Vaqif Abdullayev barəsində isə 3 aylıq həbs-qətimkan tədbiri seçilib. V.Abdullayevə qarşı Cinayət Məcəlləsinin 28, 214.2.1-ci, 28, 214.2.3-cü, 228.3-cü, 278-ci maddələr üzrə ittiham olunub.