: Fələstin hökuməti İsrail rejiminin işğal altındakı torpaqlarda yəhudi yaşayış məskənlərini inşa etməsinə mane olmaq üçün BMT Təhlükəsizlik Şurasına müraciət edib, - "TRT" xəbər verir. Təhlükəsizlik Şurasına təqdim edilən qətnamə layihəsində yəhudi yaşayış məskənlərinin qanunsuz elan edilməsi tələb olunub.

Fələstin hökumətinin rəhbərliyi altında hazırlanan layihədə "1967-ci ildən bəri işğal edilən Fələstin topraqlarında salınan, Şərqi Qüds də daxil olmaqla bütün yəhudi yaşayış məskənləri qanunsuzdur və daimi sülhün təmin olunmasının qarşısındakı ən böyük əngəldir" deyilir.
Bundan əlavə, sənəddə İsrail rejiminin ən qısa zamanda bütün yaşayış məskənləri fəaliyyətlərini tamamilə dayandırması və bütün məsuliyyətlərini yerinə yetirməsi tələb olunub. Layihəyə Türkiyə də daxil olmaqla, 120-yə yaxın ölkə dəstək verib. ABŞ isə sənədin gündəliyə salınmasına belə qarşı çıxıb. Vaşinqton yaşayış məskənləri məsələsinin müzakirələrlə həll oluna biləcəyini, bunun üçün Təhlükəsizlik Şurasında səsverməyə ehtiyac olmadığını bildirib və qətnaməyə veto qoyacağına dair mesaj verib. Təhlükəsizlik Şurasının digər 14 üzvü isə qətnaməyə dəstək verib.