Küveyt əmiri Sabah əl-Əhməd əl-Cabir əs-Sabah dövlət büdcəsindən 4 mlrd. ABŞ dollarının ölkə vətəndaşları arasında paylanması haqqında sərəncam imzalayıb.

RİA Novosti"yə istinadən xəbərinə görə, bu hədiyyə ölkənin dövlət müstəqilliyinin 50 illik yubileyi, eyni zamanda Küveytin İraq işğalından azad olmasının 20-ci və indiki əmirin hakimiyyətə gəlməsinin 5-ci ildönümü ilə əlaqədardır.

Hər bir Küveyt vətəndaşı bayram hədiyyəsi olaraq büdcədən 1000 Küveyt dinarı (3572 dollar) alacaq.

Küveyt əmiri həmçinin 14 ay (fevral 2011 - aprel 2012) ərzində ölkə vətəndaşlarına ərzaq mallarının pulsuz paylanması haqqında sərəncam verib. Pulsuz ərzaq mallarını ala bilmək üçün vətəndaşlara xüsusi kuponlar veriləcək.

Küveyt əmirinin sərəncamları 2011-ci ilin fevral ayından qüvvəyə minəcək. Əmirin pul hədiyyəsi və ərzaq kuponları ölkədə yaşayıb işləyən 2 mln. 400 min nəfər xarici vətəndaşa şamil edilməyəcək.

Qeyd edək ki, neft ehtiyatlarına görə dünyada 5-ci yeri tutan Küveytdə orta aylıq əmək haqqı 3500 dollardır.