Qafqaz Müsəlmanları İdarəsi islam alimlərinin QMİ sədri Allahşükür Paşazadəyə təzyiq göstərməsi barədə xəbərləri inkar edib. Belə ki, bəzi KİV bildirib ki, İranın din xadimləri Paşazadəni orta məktəblərdə hicaba qadağanı aradan qaldıra bilmədiyi üçün istefa verməyə çağırıblar. Əslində bu cür bəyanatlar bəzi İran telekanallarında səslənib ki, bunu da din xadimlərinin mövqeyi hesab etmək olmaz.

"Azərbaycan dünyəvi dövlətdir, din dövlətdən ayrıdır. Odur ki, burada məsələ bir tərəfin istəyilə yox, tərəflərin qarşılıqlı razılığı əsasında həllini tapmalıdır və bunun başqa yolu yoxdur, "- mənbə vurğulayıb.

Mənbə orta məktəblərdə geyim formasını hər məktəbin özünün müəyyən etməsi məsələsinə də toxunub. Bu müstəvidə hicab məsələsinin məktəb rəhbərliyi və məktəbin valideynlər şurasının birgə rəyilə həllni tapacağına ümid bəslədiyini deyib.

Mənbənin fikrincə, ölkənin siyasi rəhbərliyi bu məsələdə orta məktəblərə sərbəstlik verib və məsələ tərəflər arasında razılıq əsasında həllini tapa bilər. Əgər hansısa məktəbdə məsələ həllini tapmayacaqsa, o zaman məhkəmələrə müraciət etməyin mümkün olacaq. Mənbə dini idarə olaraq mövqelərinə gəlincə, orta məktəblərin hicablı olmaq istəyən şagirdləri üçün uyğun bir formanın tapılması mövqeyində olduqlarını nəzərə çatdırıb.

Qeyd edək ki, ötən həftə Nazirlər Kabineti ümumtəhsil məktəblərinin nümunəvi nizamnaməsini təsdiqləyib. Nizamnamə şagirdlərin forma məsələsini tənzimləyir. Sənədə görə, hər bir ümumtəhsil məktəbində forma "təhsilin dünyəvi xarakter daşıması" nəzərə alınmaqla məktəbin nizamnaməsi ilə müəyyən olunur.

Bu cür yanaşma sənədin müxtəlif cür təfsirinə imkan verir. Belə ki, hicab tərəfdarları bunu hakimiyyətin mövqeyinin yumşalması və məsələnin həllinin məktəblərin öz öhdəsinə buraxılması kimi qeyd edirlər. Təhsil Nazirliyindən bununla bağlı şərh almaq mümkün olmayıb.

Öz növbəsində Bakı şəhər Baş Təhsil İdarəsinin mətbuat xidmətinin rəhbəri Zəminə Əliqızı Turan-a bildirib ki, məktəbli forması hicab taxılmasını nəzərdə tutmur. /TURAN/