Cinayət Məcəlləsinin 228-ci (qanunsuz olaraq odlu silah, döyüş sursatı əldə etmə və saxlama) maddəsi ilə ittiham olunan Azərbaycan İslam Partiyasının sədri Mövsüm Səmədovun əmisi oğlu Dəyanət Səmədov ittihamı qəbul edib. "Media forum"a açıqlamasında Mövsüm Səmədovun həyat yoldaşı Mehparə Səmədova deyib. O, yanvarın 13-də və bu gün vəkil Anar Qasımovla görüşdüyünü, məlumatları vəkildən aldığını bildirib.

Mehparə Səmədovanın sözlərinə görə, hazırda Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində saxlanan Dəyanət Səmədova işgəncə verilib: "Onu döyüblər. Qoca əmisini, mənim qayınatam Mərdan Səmədovu qorumaq üçün ittihamı qəbul edib. Ona deyiblər ki, sən bu ittihamı qəbul eləməsən, qoca əmini bura gətirib silah-sursatı onun boynuna qoyacağıq".

Rəsmi məlumata görə, Baş Mütəşəkkil Cinayətkarlıqla Mübarizə İdarəsinin əməkdaşları şübhəli şəxs qismində saxlanılmış Mövsüm Səmədovun əmisi oğlu, Quba rayon sakini Dəyanət Səmədovun evinə və işlədiyi mağazaya baxış keçirərkən döyüş sursatı olan əl qumbaraları və avtomat patronları aşkar edib. Respublika Prokurorluğu faktla əlaqədar Cinayət Məcəlləsinin 228-ci maddəsi ilə istintaq aparır. /Musavat.com/

Qeyd edək ki, mövzu ilə əlaqədar AİP sədrinin vəkili Anar Qasımovla əlaqə saxlanılıb və o da FaktXeber.com-a verdiyi münasibətdə məlumatı təsliqləyərək bildirdi ki, Dəyanət Səmədovdan işgəncələr altında ifadə alınıb və təqsirləndirilən şəxs odlu silah tapmasını etiraf edib. "Düzdür ki, Dəyanatdan müxtəlif vasitələrlə yazılı etiraf alınıb. Lakin bu etiraf onun odlu silahı tapmasına aiddir. Hər-halda bu etirafın Mövsüm Səmədovun işinə heç bir adiyyatı yoxdur"-deyə vəkil Anar Qasımov əlavə edib.




AİP sədrinin evində axtarış sona çatdı
2011-01-13 18:26

Azərbaycan İslam Partiyasının sədri Mövsüm Səmədovun evində yanvarın 13-ü saat 15 radələrindən başlayan axtarış sona çatıb.

"Media forum" saytı xəbər verir ki, iki saat çəkən axtarış zamanı evdən kompüter prosessoru, CD-lər, Aşura mərasimindən videokaset və bir neçə kitab götürülüb.

Hadisə yerində olan mətbuat işçilərinə açıqlamasında partiya sədrinin oğlu Zeynalabdin Səmədov axtarışın sonunda protokol tərtib olunduğunu deyib: "Orada qeyd olunmuşdu ki, saxlanılan Dəyanət Səmədovun dükanında tapılanlara oxşar şübhəli əşyalar, silah, narkotik maddə evdə aşkarlanmayıb".

Axtarış bitdikdən sonra Respublika Prokurorluğunun baş müstəntiqi Vüqar Nəsibov jurnalistlərə açıqlama verməyib.

Müstəntiqlə bərabər evdə olan hal şahidləri çəkiliş aparan "Yeni Müsavat" qəzetinin əməkdaşı Samir Kazımlıya fiziki güc tətbiq ediblər. /"Media forum"/