Bu gün Bakıda "Gənclər sivilizasiyaların ittifaqı naminə" adlı iki günlük beynəlxalq konfrans başlayıb. APA-nın məlumatına görə, tədbir Heydər Əliyev Fondu və İslam Konfransı Təşkilatının Gənclər Forumu tərəfindən İSESCO, Avropa Şurası, BMT-nin İnkişaf Proqramı, Azərbaycan Gənclər və İdman Nazirliyinin dəstəyi ilə keçirilir.

Konfransın əvvəlində sivilizasiyalararası dialoq təklifi ilə çıxış etmiş İspaniya və Türkiyə baş nazirlərinin təşəbbüsü haqqında film nümayiş etdirilib. Sonra Prezident Aparatı ictimai-siyasi şöbəsinin müdiri Əli Həsənov Azərbaycan prezidenti İlham Əliyevin tədbir iştirakçılarına təbrik məktubunu oxuyub. Gəncləri böyük qüvvə adlandıran prezident məktubunda müasir dövrün reallıqlarının onlardan daha çevik iş aparmağı tələb etdiyini vurğulayıb. Türkiyənin Azərbaycandakı səfiri Hüseyn Avni Qarslıoğlu isə bu ölkənin baş naziri Rəcəb Tayyip Ərdoğanın təbrik məktubunu oxuyub.

Heydər Əliyev Fondunun prezidenti, UNESCO və İSESCO-nun xoşməramlı səfiri, Azərbaycan Milli Məclisinin üzvü Mehriban Əliyeva çıxışında sivilizasiyalararası əməkdaşlığın çox faydalı və vaxtında irəli sürülmüş təşəbbüs olduğunu bildirib. Onun fikrincə, bəşəriyyət ya dinlər və mədəniyyətlərarası dialoqa gedəcək, ya da qeyri-dözümlülüyə, zülmə və gərginliyə sürüklənəcək: "Dünyanın üzləşdiyi terror, qlobal istiləşmə, AİDS kimi dəhşətli problemlər hansısa ölkənin təşəbbüsü ilə həll oluna bilməz. Bunun üçün ümumbəşəri əməkdaşlıq lazımdır". M. Əliyeva qlobal sivilizasiyalararası gənclər təşkilatının yaradılmasının çox vacib olduğunu söyləyib, gəncləri dözümsüzlük və ekstremizmə qarşı birləşməyə çağırıb.

Tədbirdə iştirak edən Qətərin birinci xanımı, Qətər Fondunun direktoru Şeyxa Moza bint Nasir əl-Misnəd üzünü gənclərə tutara "Biz sizə etimad etdiyimizdən də yaxşı səviyyədə işləməlisiniz" söyləyib: "Təəssüf ki, bizim nəsil etimadı itirib. Bizim qoyduğumuz miras faydasızdır. Etimadsızlıq olan yerdə isə dialoq olmur. Mən gəncləri dünya liderləri ilə birlikdə iş görərək, bir-birindən aralı olan dünyaları birləşdirməyə çağırıram".

Konfrans davam edir.