Dini Qurumlarla İş üzrə Dövlət Komitəsinin rəsmisi Nahid Məmmədov bəzi məktəblərdə hicablı şagirdlərə məhdudiyyət cəhdi ilə bağlı bildirdi: "Hər bir fərdin öz dini inancından irəli gələrək, hicablı olub-olmaması öz ixtiyarındadır. Bu onun konstitusiyon hüququdur, azadlığıdır"

Dini Qurumlarla İş üzrə Dövlət Komitəsinin rəsmisi Nahid Məmmədov hicabla bağlı ictimai müzakirələrdə çıxış edərkən, bir sıra məktəblərdə hicablı şagirdlərə məhdudiyyət qoyulmasına münasibət bildirərkən, deyib: "Son zamanlarda hicab problemi gündəmdə olan məsələlərdən biridir. Əfsuslar olsun ki, Azərbaycanda bu, bir problem kimi olmadığı halda, biriləri bu məsələnin problem kimi qaldırılmasında təşəbbüskar kimi çıxış edir. Bu məsələdə hər hansı konsensus nəticəyə gəlməyə ehtiyac yoxdur. Çünki, dövlət özü hər şeyi təmin edib – dini etiqad azadlığı mövcuddur, hər kəs öz dini etiqadını sərbəst şəkildə həyata keçirə bilər. Bu gün Bakı məktəblərinin bir neçəsini çıxmaqla, ümumilikdə respublika məktəblərində bu problem yaşanmır. Nəzərə almaq lazımdır ki, əslində hicablı xanımların çox hissəsi regionlarda yaşayır".
Dövlət Komitəsinin rəsmisi dünyəvilikə bağlı bildirmişdir: "Bu, sadəcə o deməkdir ki, dövlət şəriət qanunları ilə idarə olunmur. Konstitusiyamızın yeddinci maddəsində də qeyd olunur ki, bizim dövlət – demokratik, unitar, dünyəvi, hüquqi bir respublikadır. Bu o deməkdir ki, Azərbaycan qanunları dünyəvi əsaslarla hazırlanır və sadəcə, şəriət qanunvericiliyinə əsaslanmır. Əlbəttə, bu bir başqa məsələdir ki, dünyəvi olmasına baxmayaraq, dövlət hər hansı bir qanun qəbul edən zaman həmin ölkədə yaşayan insanların dini etiqadını da nəzərə alır. Bu bir faktdır və Milli Məclisdə müxtəlif qanunların müzakirəsi zamanı da biz bunun şahidi olmuşuq".
Dövlət Komitəsinin məmuru hicab məsələsi ilə bağlı bildirmişdir: "Hicab məsələsi qanunla tənzimlənmir və tənzimlənə də bilməz. Belə ki, bu bir əqidə məsələsidir. Bəli, hər hansı bir məmurun rəhbəri olduğu orqanın səlahiyyətləri çərçivəsində qərar vermək səlahiyyəti var. Və məktəbli forması ilə bağlı bu qərar da verilib. Təbii ki, hər bir fərdin öz dini inancından irəli gələrək hicablı olub-olmaması öz ixtiyarındadır. Bu onun konstitusiyon hüququdur, azadlığıdır".
N.Məmmədov müzakirələr zamanı şəri həddi-buluğa çatmayan azayaşlı qızların örtünməsini təqdir etmədyini dedi. Bu fikrə cavab olaraq, çıxış edən spiker H. Hacıyeva bildirdi ki, bu, beynəlxalq hüquqla tənzimlənən və valideynlərin öhdəsinə buraxılan bir demokratik normadır.