Qafqaz Müsəlmanları İdarəsinin (QMİ) bir nəfər əməkdaşı Türkiyənin Sivas bölgəsində baş verən qəza ilə əlaqədar yaralanan zəvvarların vəziyyəti ilə yerindəcə tanış olmaq və onların Azərbaycana gətirilməsini təşkil etmək üçün bu bölgəyə ezam olunub.

Bu barədə APA-ya QMİ mətbuat xidmətinin rəhbəri Rəhimə Dadaşova məlumat verib. O bildirib ki, zəvvarlardan 7 nəfəri Sivas, 1 nəfəri Kayseri, 1 nəfəri isə Adana xəstəxanasındadır.

Sivasdakı xəstəxanada olan 7 zəvvardan 6 nəfəri yaralıdır, 1 nəfər isə yaralı olan həyat yoldaşına yardım etmək üçün onun yanında qalıb.

R. Dadaşova yaralıların vəziyyətinin yaxşıya doğru getdiyini bildirib. Onlardan bir neçəsinin yaxın günlərdə xəstəxanadan buraxılacağı gözlənilir.

Hadisə baş verən vaxt QMİ sədri Şeyxülislam Hacı Allahşükür Paşazadə Sivas bölgəsində olub, sonradan isə müayinə olunduğu Almaniyaya qayıdıb.

Qeyd edək ki, noyabrın 23-də azərbaycanlı zəvvarları Vətənə gətirən avtobus Türkiyənin Sivas bölgəsində qəzaya uğrayıb. Hadisə nəticəsində 5 nəfər ölüb, 29 nəfər yaralanıb. Ölənlərin meyitləri və yaralılardan 20 nəfəri noyabrın 24-dən 25-nə keçən gecə xüsusi təyyarə ilə Bakıya gətirilib. Avtobusun sürücüsü Asif Bağırov həbs olunub.