İranın Azərbaycanda sərgi salonunun açılışı üçün ölkə rəhbərləri arasında tam razılıq olub.

APA-nın məlumatına görə, bu sözləri İranın Azərbaycandakı səfiri Məhəmmədbaqir Bəhrami İran İslam Respublikasının Bakıda keçirilən V beynəlxalq sərgisinin açılışında deyib.

Diplomat bildirib ki, sərgi kompleksinin binasının tikilməsi üçün artıq yer ayrılıb və yaxın 1-2 il ərzində bina tikilib istifadəyə veriləcək. Azərbaycandakı sərgi kompleksində İranın 32 vilayətindən daimi nümayəndələr olacaq. İranda istehsal edilən bütün növ məhsullar il ərzində bu kompleksdə sərgilənəcək.

Səfir İran istehsalı olan qaz sobalarının təhlükəsizliyi məsələsinə də münasibət bildirib: "İranda istehsal olunan qaz sobaları beynəlxalq standartlara cavab verir. Biz bunları Avropa ölkələrinə də ixrac edirik. Qaz sobalarını Azərbaycana ixrac etmək üçün də sertifikat alınıb. Sobalar təhlükəli deyil, yalnız ondan istifadə etməyin qaydalarına düzgün riayət etmək lazımdır".

M. Bəhrami qeyd edib ki, İran Azərbaycanla bütün sahələrdə illik ticarət dövriyyəsini 10 milyard dollara çatdırmaq əzmindədir: "Ümid edirəm ki, iki ölkənin rəhbərlərinin səyi nəticəsində istədiyimizə nail olacağıq".

Qeyd edək ki, İran islam Respublikasının Azərbaycanda keçirilən V beynəlxalq sərgisi bu gündən öz işinə başlayıb. Sərgi oktyabrın 19-na qədər davam edəcək.