Azərbaycan prezidenti İlham Əliyev və Özbəkistan prezidenti İslam Kərimov sentyabrın 27-də Daşkənddəki "Həzrəti-İmam" məscid kompleksində olublar. Bu barədə APA ’’Azərtac’’a istinadən məlumat verir.

Komplekslə tanışlıq zamanı məlumat verilib ki, bu möhtəşəm məscid Özbəkistan prezidenti İslam Kərimovun təşəbbüsü ilə 2007-ci ildə inşa olunub. Məscidin girişində səndəl ağacından oyma naxışlı 20 sütunlu eyvan var. Tikinti zamanı milli özbək memarlığının elementlərindən geniş istifadə edilib. Məscidin içəri tərəfdən zər vərəqlə işlənmiş günbəzi var.

Prezident İlham Əliyev XVI əsrdə inşa olunmuş "Muyi–mübarək" mədrəsəsinə və Özbəkistan Müsəlmanları İdarəsinin kitabxanasına baxıb. Kitabxananın fondunda XII əsrə aid Qurani-Kərim və digər nadir Şərq əlyazmaları saxlanılır.

Prezident İlham Əliyev kompleskin Fəxri qonaqlar kitabına ürək sözlərini yazıb.