Azərbaycanda səfərdə olan Mərakeş Krallığı Parlamenti Nümayəndələr Palatasının sədri Abdelvahed Radi sentyabrın 24-də Təzəpir məscid kompleksində olub. Bu barədə APA "Azərtac"a istinadən məlumat verir.

Abdelvahed Radi Qafqaz Müsəlmanları İdarəsinin konfrans zalı ilə tanış olub, ümummilli lider Heydər Əliyevin fəaliyyətini əks etdirən fotostendə, eləcə də idarədəki eksponatlara baxıb.
Təzəpir məscid kompleksi ilə tanışlıqdan sonra Qafqaz Müsəlmanları İdarəsinin sədri şeyxülislam Allahşükür Paşazadənin və Mərakeş Krallığı Parlamenti Nümayəndələr Palatasının sədri Abdelvahed Radinin görüşü olub.

Görüşdə ikitərəfli münasibətlər, dini məsələlər barədə fikir mübadiləsi aparılıb.
Azərbaycanın həmişə tolerantlığın, qardaşlığın, dostluğun məkanı olduğunu vurğulayan şeyxülislam deyib ki, cari ildə Bakıda dünya dini liderlərinin sammiti keçirilib. Sammitdə 30-dan çox ölkənin, bir sıra beynəlxalq təşkilatın nümayəndələri iştirak ediblər. Bu, Azərbaycan dövlətinin mənəviyyat və din sahəsində həyata keçirdiyi siyasətə verilən qiymətin bariz nümunəsidir.

Dağlıq Qarabağ münaqişəsi barədə məlumat verən A.Paşazadə, ölkəmizin ədalətli mövqeyini dəstəklədiyinə görə Mərakeş Krallığına təşəkkürünü bildirib.

Mərakeş Krallığı Parlamenti Nümayəndələr Palatasının sədri Abdelvahed Radi tarix boyu İslam mədəniyyətinə, sivilizasiyasına verdiyi töhfələrə görə Azərbaycan xalqına öz təşəkkürünü bildirib.

Abdelvahed Radi diqqətə çatdırıb ki, Mərakeşdə Azərbaycanın Dağlıq Qarabağ problemini yaxşı başa düşürlər. Mərakeş Krallığı bu problemlə bağlı rəsmi Bakının nümayiş etdirdiyi mövqeyi yüksək qiymətləndirir.

Qonaq Mərakeş Krallığının Azərbaycan ilə siyasət, iqtisadiyyat, din və digər sahələrdə əməkdaşlıqda maraqlı olduğunu da qeyd edib.

Sonda qonağa xatirə hədiyyələri təqdim olunub.