Dini Qurumlarla İş üzrə Dövlət Komitəsində illik hesabatla bağlı iclas keçirilib. Tədbirdə giriş sözü ilə çıxış edən Komitənin sədri Rafiq Əliyev Azərbaycan hökumətinin Xocalı soyqırımı ilə bağlı həqiqətləri dünya ictimaiyyətinə çatdırması ilə əlaqədar qısa məlumat verib. R.Əliyev bu yaxınlarda Avropa Parlamentinin Naxçıvan Muxtar Respublikasının Culfa şəhərində erməni qəbiristanlığının "dağıdılması" ilə bağlı Qətnaməsinin əsassız olduğunu söyləyib.Komitə sədri 2005-ci ildə görülən işlər barəsində məlumat verib. Qeyd olunub ki, son illərdə islam və qeyri-islam təmayüllü dini icmaların Dövlət Komitəsinə, bütövlükdə hökumətə olan etimadı və inamı daha da artıb.
Ötən il ərzində 25 dini icmanın qeydiyyatdan keçdiyini bildirən Komitə sədri müxtəlif dini cərəyanların təbliğat üsulları haqqında da məlumat verib. R.Əliyev dini fəaliyyət sahəsində dövlət siyasətinin həyata keçirilməsi, cəmiyyətdə dini dözümlülüyü, tolerantlığı bərqərar etmək məqsədilə Dövlət Komitəsi tərəfindən 2005-ci ildə Respublikanın müxtəlif bölgələrində "Dövlət-din münasibətlərinin tənzimlənməsi", "Dövlət və din", "Dinin cəmiyyətdə rolu" mövzularında 14 seminar-müşavirənin keçirildiyini qeyd edib.

R.Əliyevin sözlərinə görə, Dövlət Komitəsinin BMT-nin İnkişaf Proqramı ilə birgə hazırladığı "Azərbaycanda AİDS-ə qarşı mübarizədə dini icmaların rolu" layihəsi 2005-ci ildə də davam etdirilib və Bakıda, Bakıətrafı kəndlərdə, eləcə də Azərbaycanın bir sıra rayonlarını əhatə edən Quba, İsmayıllı və Gəncə kimi çoxsaylı əhaliyə malik məntəqələrdə dini icmaların rəhbərləri və üzvlərinin iştirakı ilə seminarlar təşkil olunub, təlimatlar və broşürlərin hazırlanmasında birbaşa iştirak edilib. Layihədə nəzərdə tutulmuş çoxsaylı bukletlər Azərbaycan və rus dillərində nəşr olunaraq yayılıb. Hazırda isə qısametrajlı telefilm hazırlanır.
"Ötən ildə Dini Qurumlarla İş üzrə Dövlət Komitəsinin əməkdaşları müxtəlif televiziya proqramlarında və qəzet səhifələrində mütəmadi olaraq çıxışlar edib, müsahibələr verib, dini durum, dini təhsil və dinlə bağlı məsələlər, din sahəsində dövlət siyasətinin əsas istiqamətlərini şərh ediblər", - deyən R.Əliyev müsahibə və məqalələrin sayının 200-dən çox olduğunu vurğulayıb.
İl ərzində hər biri 1000 nüsxədən ibarət, Dövlət Komitəsinin fəaliyyətini əks etdirən bülletenin nəşr edilib müvafiq dövlət qurumlarına, beynəlxalq təşkilatlara və dini icmalara paylandığını qeyd edən Komitə sədri 2005-ci ildə Azərbaycan, rus və ingilis dillərində yeniləşmiş "Dövlət və din", Azərbaycan və rus dillərində isə "Dinin əsasları" kitablarının çap edilib yayıldığını söyləyib.
R.Əliyev həmçinin rəhbərlik etdiyi Dövlət Komitəsinin əsas iş istiqamətlərini də qeyd edib. Onun sözlərinə görə, cari ildə din sahəsində maariflənmə işlərinin genişlənməsi və KİV-də təbliğat xarakterli məqalələrin monitorinqinin gücləndirilməsi gözlənilir. Dövlətin dini sahədə apardığı siyasətə regionların cəlb edilməsi, yerli dini qurumlarla əlaqələrin genişləndirilməsi, qonşu ölkələrlə beynəlxalq əlaqələrin möhkəmlənməsi, həmçinin elektron hökumətin yaradılması proqramı çərçivəsində müəyyən tədbirlərin həyata keçirilməsinin vacibliyi vurğulanıb.
İclasın sonunda bir sıra cari məsələlər müzakirə edilib və Komitənin 2005-ci ildə gördüyü işlər qənaətbəxş hesab olunub.