Brüsseldə fəaliyyət göstərən Beynəlxalq Böhran Qrupu xüsusi hesabat yayıb. Həmin hesabatda "Hizbut-Təhrir"in fəallaşmasından bəhs olunur. Hesabatda deyilir: "Bizdə olan məlumatlara görə, bu hərəkat aktiv fəaliyyətə keçməyə hazırlaşır. Əsas diqqət İraq, Əfqanıstan, Orta Asiya və Qafqaza yönəlib. Həmin regionlarda terror aktları, zorakılıq və radikal ekstremizmin güclənəcəyini istisna etmirik".

Postsovet məkanındakı "təhrir"çilərin Azərbaycanda da fəallaşması təxmin olunur. Maraqlı olan məqam odur ki, əgər indiyədək ölkəmizdəki "Hizbut-Təhrir"i Orta Asiya dövlətlərindəki "rəhbərlər" idarə edirdilərsə, hazırda nəzarət mexanizmi dəyişib. Ekstremistlər Azərbaycanda çoxşaxəli məxfi qruplaşma şəbəkəsi yaratmaq üçün idarəçiliyi Ukraynadan həyata keçirmək niyyətindədir.
Ukraynada Krım tatarları arasında öz ideyalarını yaymaqda "Hizbut-Təhrir"in Azərbaycanla bağlı məqsədləri var. İlk baxışda bu inandırıcı təsir bağışlamır. Çünki Azərbaycanda Krım tatarlarının icması yox səviyyəsindədir. Amma unutmayaq ki, 2002-ci ildə Azərbaycanda dövlət çevrilişinə cəhd və ABŞ-ın Bakıdakı səfirliyini partlatmağa hazıraşmaqda suçlandırılaraq həbs edilmiş altı nəfər "təhrir"çidən biri - Simferopol sakini Yunis Vəliyev Krım tatarıydı.
İstintaq zamanı "təhrir"çilərdən müsadirə edilmiş ədəbiyyat arasında "Hizbut-Təhrir: İslam xilafəti" kitabından götürülmüş tezislər də vardı.
Xatırladaq ki, tam adı "Hizbut-Təhrir əl İslami" olan hərəkat 1954-cü ildə yaradılıb. Onların qərargahlarından biri İordaniyada, digəri isə Səudiyyə Ərəbistanında yerləşir. Özünü "partiya" adlandıran hərəkatın rəsmi bəyanatlarına görə, onun başlıca məqsədi insanlara Qurani-Kərimdə göstərilən mömin həyatı öyrətməkdir. Əslində isə hərəkatın üzvləri fəal terrorla məşğuldur. Qazaxıstan, Qırğızıstan, Rusiya, Tacikistan və Özbəkistanda fəallıq göstərən "Hizbut-Təhrir" dəfələrlə Azərbaycanda da möhkəmlənməyə cəhd göstərib.