Belçikada Dövlət Şurası tarixi sayılacaq qərarla baş örtüyü qadağası qoyma səlahiyyətinin məktəblərə aid olmadığına hökm verdi. Dövlət Şurasının 12-ci dairəsi ötən il Brüsseldə baş örtüyünə görə məktəbdən uzaqlaşdırılmış din dərsi keçən müəllimin şikayət ərizəsini müzakirə edərək, baş örtüyünü çıxarmaq istəməyən müəllimin haqlı olduğuna qərar verdi. Qərar digər şəhərlərdə həmin vəziyyətdə olan müəllimlər üçün nümunə olduğu halda, dini azadlıqla dövlətin tərəfsizlik prinsipi arasında mövcud mübahisələrin yenidən alovlanmasına səbəb oldu.

Avropadakı sadiq oxucularının www.islam.com.az saytına verdikləri xəbərə görə, Belçika Dövlət Şurası Brüsselin Sint-Piters-Voluv bələdiyyəsindəki dövlət ibtidai məktəbinin 2005-ci il qəbul edilmiş baş örtüyünü qadağan edən qərarını xətm etdi. Həmin qərarda məktəblərə dini rəmzlərin daxil olmasına icazənin verilməsinin məktəblərin səlahiyyətinə daxil olmadığı deyilir. Belə ki, 2005-ci ildə həmin məktəbdə işləyən başı örtüklü iki din müəlliminin baş örtüklərini çıxarmaq istəməmələri səbəbilə 2006-cı ilin yanvar ayında fəaliyyətlərinə son qoyulmuşdu. Flamand ictimai idarəsinə şikayət edən iki müəllim həmin qurumun 31 iyul 2006-cı il tarixli qərarı ilə haqsız elan edildikdən sonra, müəllimlərdən biri şikayət ərizəsini Dövlət Şurasına təqdim etdi. Dövlət Şurasının 12-ci dairəsinin qəbul etdiyi bir gün əvvəlki qərarı Belçikada bir çox qurumlara böyük təsir edəcək tərzdə həyata keçirildi. Ali Hakimlər Kollegiyası məktəblərdə baş örtüyünü qadağan etmək səlahiyyətinin məktəblərə aid olmadığı, bu səlahiyyətin yalnız Flamand və Vallon cəmiyyətində dövlət məktəblərinin tabe olduğu Ali Təhsil Şurasına aid olduğu haqqında hökm çıxardı. Hüquqi dairələr ölkədə baş örtüyü mövzusunun yenidən aktual olduğu bir halda Dövlət Şurasının belə bir qərar qəbul etməsini ali hakimlərin əslində baş örtüyü probleminin federal səviyyədə nəzərə alınmasının zəruri olduğuna işarə etdiklərini bildirirlər. Konstitusiya ilə təmin edilən din və etiqad azadlığı prinsipinin icraatı ilə ictimai vəzifə tutanların tərəfsiz olma şərtinin təcrübədə reallaşmasının bəzən bir-biri ilə ziddiyyət təşkil etməsinə nəzərlərini yönəldən mütəxəssislər dövlətin indiyə qədər çox həssas olan baş örtüyü kimi bir məsələnin müzakirəsini yerli idarələrə həvalə edərək, müəyyən formada işin içindən çıxdıqlarına görə tənqid edirlər.

Dövlət Şurasının qərarını qiymətləndirən türk vəkilləri qərarın çox əhəmiyyətli olduğunu, lakin bunun məktəblərdə baş örtüyünə sərbəstlik verilməsi mənasına gəlmədiyini vurğulayırlar. Hüquqşünaslar Dövlət Şurasının qərarı ilə artıq məktəblərin öz təşəbbüsləri ilə əldə etdikləri baş örtüyü qadağası haqqında hökmün qüvvəsini itirdiyini, ikicəmiyyətli Belçikada ictimai idarələrdə Ali Təhsil Şuraları tərəfindən yalnız bununla bağlı qəbul edilən qərarın bütün məktəblərdə icra ediləcəyini ehtimal edirlər.