Artıq 2011-ci ilin ortalarından etibarən Suriya Azərbaycan qazının idxalına başlayacaq.

"APA-ECONOMICS"in məlumatına görə, bunu Azərbaycanda səfərdə olan Suriyanın neft və mineral ehtiyatlar naziri, Suriya-Azərbaycan hökumətlərarası komissiyanın həmsədri Sufian əl-Alao bildirib.

Nazirin sözlərinə görə, hazırda Türkiyə ilə Suriya arasında kəmərlərin birləşdirilməsi prossesi həyata keçirilir və bu işlər başa çatdıqdan sonra Azərbaycan qazının Suriyaya ixracı başlanacaq: "Azərbaycan qazının Suriyadan digər ərəb ölkələrinə, həmçinin Aralıq dənizi sahillərindən Avropaya nəqli həyata keçirilə bilər".

Suriyanın Azərbaycan qazının idxalı və tranzitində maraqlı olduğunu bildirən nazir onu da qeyd edib ki, artıq Azərbaycan və Suriya arasında lazımi sənədlər imzalanıb.

Xatırladaq ki, ilkin mərhələdə Azərbaycandan Suriyaya ildə 1 mlrd. kubmetr həcmində təbii qazın ixracı planlaşdırılır.