Bakıda keçirilən İslam İnkişaf Bankı (IDB) Direktorlar Şurasının Bakıda təşkil olunmuş növbəti illik toplantısı çərçivəsində banka üzv olan və olmayan ölkələrdə müsəlman icmaları üçün yeni layihələrin maliyyələşdirilməsi üçün 241,4 mln. ABŞ dolları məbləğində vəsaitin ayrılması təsdiq edilib.

"APA-ECONOMICS"in məlumatına görə, ayrılan maliyyə vəsaiti banka üzv olan ölkələr, o cümlədən Çad, İran, Mali, Seneqal, Burkina-Faso, Syerra Leone, Toqo, Livan və Nigeriya üçün yeni inkişaf layihələri və ərəb dünyasında gənclərin məşğulluğu üzrə texniki yardım qrantı üçün nəzərdə tutulub.

Şura həmçinin Vəqf Fondundan Burundi, Efiopiya, Qana, Hindistan, İsveç və Niderlanddakı müsəlman icmaları üçün proqramlar üzrə texniki yardım qrantlarını da təsdiq edib.

Bunula yanaşı, IDB Tacikistanda daşqınlardan, Qırğızıstanda etnik qarşıdurmadan və Nigeriyada ərzaq böhranından əziyyət çəkən insanlara yardım göstərmək məqsədilə 3,4 mln. dollar məbləğində vəsaitin ayrılmasını da təsdiq edib.

Qeyd edək ki, 2009-cu il üzrə xarici ticarətin maliyyələşdirilməsi də daxil olmaqla IDB tərəfindən təsdiq olunan maliyyə paketi 457 əməliyyat üzrə 7,254 mlrd. dollar təşkil edib. Bu da 2008-ci ildəkindən 29% çoxdur. IDB tərəfindən yaradıldığı vaxtdan - 1975-ci ildən 2009-cu ilin sonunadək təsdiq edilən maliyyə paketi 64 mlrd. dollar təşkil edib.