Səudiyyə Ərəbistanı Şura Məclisinin sədri Abdulla bin Məhəmməd bin İbrahim Əl Əş-Şeyx Azərbaycana gəlib. APA-nın məlumatına görə, səfər Azərbaycan Milli Məclis sədrinin dəvəti ilə baş tutub.

Qonaq Heydər Əliyev Beynəlxalq Hava Limanında jurnalistlərə verdiyi açıqlamada səfərin məqsədinin Səudiyyə Ərəbistanı Şura Məclisi ilə Azərbaycan MM arasında əlaqələrin inkişafı olduğunu bildirib. "İki ölkə arasında siyasi əlaqələr çox yüksək səviyyədədir" deyən Səudiyyə Ərəbistanı Şura Məclisinin sədri səfər çərçivəsində Azərbaycan parlamentinin sədri və Azərbaycan-Səudiyyə Ərəbistanı Parlamentlərarası Dostluq Qrupunun üzvləri ilə görüşlər keçirəcəyini qeyd edib: "Görüşlərdə iki ölkə parlamentləri arasında əlaqələrinin inkişafı məsələləri müzakirə olunacaq".

Azərbaycana səfərini çox yüksək qiymətləndirən qonaq bunun əməkdaşlığın daha da güclənməsinə, tərəflərin daha da yaxınlaşmasına təkan verəcəyinə əminliyini ifadə edib.

Dağlıq Qarabağ münaqişəsinin həllinə toxunan Səudiyyə Ərəbistanı Şura Məclisinin sədri ölkəsinin Azərbaycanın hüquqlarının təmin olunması baxımından beynəlxalq təşkilatların verdiyi qərarları dəstəklədiyini vurğulayıb: "Səudiyyə Ərəbistanının Dağlıq Qarabağ probleminə münasibəti çoxdan bəllidir və bu münasibət dəyişməz qalacaq".