Qətərin paytaxtı Doha şəhərində keçirilən 10-cu Doha Forumunda iştirak edən Azərbaycan nümayəndə heyətinin üzvü, millət vəkili Qənirə Paşayeva toplantıda çıxış edib.

APA-nın məlumatına görə, millət vəkili Ermənistanın işğalçılıq siyasəti yeridərək Azərbaycan ərazilərinin 20 faizini işğal etdiyini, bunun nəticəsində 1 milyon azərbaycanlının yurd-yuvasından, evindən didərgin düşdüyünü xatırladıb.

Ermənistanın Azərbaycan torpaqlarını işğal etməsi nəticəsində Azərbaycanda hər 9 azərbaycanlıdan birinin qaçqın və məcburi köçkün həyatı yaşadığını deyən Q. Paşayeva bildirib ki, Ermənistan işğal etdiyi ərazilərdə azərbaycanlılara məxsus evləri, məktəbləri, təhsil ocaqlarını, tarixi və mədəniyyət abidələrini dağıdıb. O, iştirakçıları 1 milyon insanın həyatına biganə qalmamağa, onların öz evlərinə, yurd yuvalarına dönmələri istiqamətində səylərini, Azərbaycana dəstəklərini artırmağa çağırıb.

Ermənistanın BMT-nin 4 qətnaməsinə, Avropa Şurası Parlament Assambleyası, İslam Konfransı Təşkilatı və digər beynəlxalq təşkilatların qətnamələrinə məhəl qoymayaraq Azərbaycan torpaqlarından çəkilmədiyini xüsusi vurğulayan millət vəkili bəyan edib ki, beynəlxalq ictimaiyyət işğalçı Ermənistana işğal etdiyi torpaqlardan çəkilməsi üçün təzyiqləri artırmalıdır.

Bundan sonra çıxış edən bəzi sammit iştirakçıları Azərbaycanın ədalətli mövqeyini dəstəkləyərək Azərbaycan torpaqlarının işğaldan azad edilməsi, qaçqın və məcburi köçkünlərin öz yurd-yuvasına dönməsi, münaqişənin tənzimlənməsi istiqamətində beynəlxalq ictimaiyyətin və təşkilatların öz fəaliyyətlərini artırmasının vacibliyini vurğulayıblar.

Forum çərçivəçində bir çox ölkədən olan iştirakçılara Heydər Əliyev Fondunun hazırladığı və Azərbaycan həqiqətlərini, Ermənistanın işğal etdiyi Azərbaycan torpaqlarında vandalizm aktlarını, Xocalı soyqırımını əks etdirən kitablar və digər materiallar təqdim olunub.

Qeyd edək ki, forum Qətər Xarici İşlər Nazirliyi, Qətər Universitetinin İctimai, İqtisadi Tədqiqatlar Mərkəzi və bu ölkənin İş Adamları Birliyinin birgə təşkilatçılığı ilə keçirilir. Beynəlxalq dialoqa həsr olunan tədbirdə iqtisadi, sosial, humanitar sahələrdə əməkdaşlığın inkişaf perspektivləri barədə fikir mübadiləsi aparılır.