Bəhreynin Beynəlxalq İnvestisiya Bankı Azərbaycan Bankını islamlaşdıracaq

Bəhreyndə yerləşən Beynəlxalq İnvestisiya Bankı İİB Azərbaycanın ən iri kommersiya banklarından olan "Əmrahbank"ın səhmlərinin 49 faizini aldığını elan edib. Məlumatı "Gulf-News" agentliyi yayıb. Məlumatda deyilir ki, İİB "Əmrahbank"la əməkdaşlığı genişləndirərək Azərbaycanda islam şəriəti qaydaları əsasında yüksək keyfiyyətli maliyyə xidmətləri göstərən İslam kommersiya bankına çevirmək niyyətindədir.

İİB hər il "Əmrahbank"dan əldə etdiyi gəlirlərin 21 faizini müəssisənin inkişafına yatıracaq. "Əmrahbank" 1993-cü ildə yaradılıb və Azərbaycanın bölgələrində 20 filialı var. Bankda 250-dən çox adam işləyir. Dövlətə məxsus olan Beynəlxalq Bank istisna olmaqla "Əmrahbank" hazırda Azərbaycanda ən gəlirli bank sayılır. Agentliyin qeyd etdiyinə görə Dünya Bankı Azərbaycanın ən sürətli iqtisadi inkişafa malik ölkələrdən biri olduğunu bildirib.

Məhz Azərbaycanın ildə orta hesabla 30 faiz iqtisadi artıma malik olması Bəhreyn bankını bura investisiya yatırmağa sövq edib. "Əsas iqtisadi və demoqrafik göstəricilər Azərbaycanda maliyyə sektorunda xidmətlər olan ehtiyacın böyük olduğunu göstərir, eyni zamanda bu ölkədə islam qaydalarına uyğun bank xidmətləri göstərilməsi sahəsində boşluq var" deyə İİB-nin direktoru Abed əl-Zira agentliyə bildirib.

"Biz hesab edirik ki, bu investisiya ölkənin sürətli iqtisadi inkişafı və "Əmrahbank"ın bu yaxınlarda Azərbaycanda şəriət qaydalarına uyğun maliyyə xidmətləri göstərmək sahəsində birincilik etməyə başlaması sayəsində tezliklə özünü doğruldacaq." Abed əl-Zira deyib ki, bu, İİB-nin Azərbaycana yatırdığı ilk investisiyadır. Lakin ilk dəfə deyil ki, İİB xarici ölkələrdə şəriət qaydaları əsasında işləyən banklar yaradır. Onun sözlərinə görə İİB hazırda Britaniyada yerləşən Avropa İslam İnvestisiya Bankının səhmdarlarından biridir.

"Əmrahbank"ın prezidenti Yunis İldırımzadə isə deyib ki, onlar bankın keçmişdəki və indiki fəaliyyəti ilə fəxr edir. "Biz ümid edirik ki, İİB-in dəstəyi ilə bank daha da inkişaf edəcək." Lakin İİB-in "Əmrahbank"ın səhmlərinin 49 faizi üçün nə qədər ödədəyi açıqlanmır. Bu yaxınlarda İİB Əbu-Dabidə daşınmaz əmlak sahəsindəki layihəyə 197 milyon, Almaniyada isə üç biznes layihəsinə 220 milyon dollar yatırıb.

Qeyd edək ki, Azərbaycan dünyəvi dövlət olduğuna görə burada şəriət qaydaları əsasında fəaliyyət göstərən bankın yaradılması suallar doğura bilər. Şəriət qaydalarına görə sələmçilik və faiz almaq günahdır, ona görə də islam bankları gəlir əldə etmək üçün fəqrli mexanizm seçirlər.