"İraq və Şam İslam Dövləti" (İŞİD) terror qruplaşmasının lideri Əbu-Bəkir Bağdadi haqqında daha bir maraqlı məlumat üzə çıxıb. Suriyadan sonra İraqı da qana bulayan və orada xəlifəlik elan edən "xəlifə" Əbu-Bəkir Bağdadinin 2005-2009-cu illərdə ABŞ məhbusu olduğu məlum olub.

Mövzu ABŞ Dövlət Departamentinin gündəlik mətbuat brifinqində də gündəmə gəlib. ABŞ Dövlət Departamentinin mətbuat katibi Cen Psaki isə məsələ ilə bağlı sualları cavablandırmaqdan yayınıb.

Federal Təhqiqatlar Bürosu (FBİ) tərəfindən başına 10 milyon dollar mükafat qoyulan Bağdadi 20005-2009-cu illərdə – 4 il ərzində Bukka düşərgəsində amerikalıların əlində məhbus həyatı sürüb.

Bağdadinin ən çox axtarılanlar siyahısında olan fotoşəkilinin də elə ABŞ tərəfindən həbs edilərkən çəkildiyi bildirilir.

Bəs görəsən ABŞ tərəfindən "ən təhlükəli terrorçular" siyahısına alınan və uzun illər "əl-Qaidə" terror təşkilatının İraq qoluna rəhbərlik edən, çoxlu sayda terror əməliyyatlarının müəllifi olan Bağdadi necə azadlığa çıxa bilib?

Məlum məsələdir ki, terrorçu qruplaşmalar adətən "səhnəarxası" qüvvələrin maraqlarını ifadə edirlər. Həmin maraqlardan asılı olaraq, bəzi hallarda ələ keçirilən terrorçular fiziki olaraq məhv edilir, bəzən müəmmalı şəkildə yoxa çıxır, bəzən isə yeni layihələrə cəlb edilərək, yeni öhdəliklərlə azadlığa çıxırlar.

Suriya və İraqdakı hadisələri izlədikdə, birdən-birə İŞİD kimi güclü maddi-texniki-həbri resurslara malik yeni bir qüvvənin ərsəyə gəlməsi və az müddətdə böyük əraziləri ələ keçirib İslam xilafəti elan etməsi çoxlu suallar yaradır. Xüsusilə elə bir halda ki, Qərb ölkələri bu terrorçu qruplaşmanın dağıdıcı fəaliyyətinə və "strateji tərəfdaş" adlandırdıqları İraqı viran qoymasına seyrçi münasibəti bəsləyir. İŞİD də öz növbəsində, bütün region dövlətlərini təhdid etdiyi bir halda, Qərbin regiondakı maraqlarına xələl gətirəcək kiçicik bir hərəkətə də yol vermir.

Analitiklərə görə, İŞİD faktiki olaraq regionda ABŞ-ın "Yeni Yaxın Şərq" layihəsinin gerçəkləşməsi üçün münbit şərait yaradır. Həmin plana Suriya və İraqın parçalanması, bölgədə yeni dövlətlərin, o cümlədən də Kürdüstanın yaranması daxildir. Bu səbəbdən də, ABŞ bilavasitə öz hərbi maşınını işə salmadan, İŞİD kimi "işəyarayan" vasitədən məharətlə istifadə edir. Digər tərəfdən, İŞİD-in güclü bir qüvvəyə çevrilməsi ilə, region dövlətlərini daha artıq özündən asılı vəziyyətə salır.

Bütün bu deyilənlər belə bir ehtimalı gücləndirir ki, yeni elan edilmiş İslam xilafətinin lideri Əbu-Bəkr Bağdadi rəsmi Vaşinqtonun işə saldığı yeni layihənin tərkib hissəsidir və o, bu və ya başqa şəkildə elə ABŞ-a işləyir.