Papalığın Dinlərarası Dialoq Komitəsinin sədri Kardinal Tavran: "Qurani-Kərim mövcud olduqca müsəlmanlarla dialoq aparmaq çətindir" deyib

Vatikan müsəlmanlarla sözün əsl mənasında teoloji dialoq aparmağın mümkünsüzlüyünü bildirib. Səbəb isə müsəlmanların Qurani-Kərimi Allahın kəlamı olduğunu qəbul etmələri və Quran barəsində dərin mübahisənin qəbul edilməz olduğuna inanmalarıdır. Həmçinin, Kardinal Jan Lui Tavran bildirb ki, "Müsəlmanlar Quranı Allahın kəlamı hesab etdiyi üçün Quran mövzusunda dərin mübahisə etməyi qəbul etmirlər. Məsələyə belə yanaşma ilə əqidə mövzusunda mübahisə etmək çətindir".

138 müsəlman akademik və alimin Roma katolik kilsəsinin ruhani lideri Papa XVI Benediktə ünvanladığı məktubda xristianları iki din arasında sülhpərvər bir əlaqə yaratmağa dəvət edərək məktubda "Dünyanın gələcək taleyi müsəlmanlar ilə xristianlar arasındakı sülhdən asılıdır" deyə vurğulayıblar. Tavran müsəlman alimlərin müraciətini "müsbət" və "cəsarətli" kimi qiymətləndirərək bildirib: "Bu son dərəcə cəsarətverici bir siqnaldır. Belə ki, niyyət və dialoqla bəzi nəticələrə nail olmaq mümkündür. Bu, dialoq mövzusuna mənəvi bir yanaşmadır. Bunu mənəviyyat dialoqu da adlandıra bilərəm".

Kardinal Tavran Papa XVI Benediktin bazar günü Napolidə edilməsi gözlənilən çıxışında müsəlman alimlərin və akademiklərin müraciətinə cavab verə biləcəyini də istisna etməyib.

Bundan başqa Kardinal Tavran xristian ölkələrində məscidlərin inşa edildiyini, ancaq müüsəlman ölkələrində kilsə inşa edilmədiyini irəli sürərək bu məsələnin də müzakirə olunmasının vacib olduğunu iddia edib.