“İslam” adı ilə törədilən terror aktları və qanlı cinayətlər artıq günümüzün bir reallığına çevrilib

Dünya mətbuatı az qala hər gün dünyanın müxtəlif yerlərində radikal vəhhabilərin qanlı hücumları haqda xəbərlər yayırlar.

Bugünün payıda düşən belə məlumat ABŞ prezidenti Barak Obamanın ata vətəni Keniyadan gəldi: “Somalinin vəhhabi-terrorçu "əş-Şəbab" qruplaşması qonşu Keniyada qanlı terror aktı həyata keçirib. Terror nəticəsində 48 nəfər qətlə yetirilib.”

"Əş-Şəbab" qruplaşması terror aktına görə məsuliyyəti öz üzərinə götürüb. Qruplaşma üzvlərinin veb səhifədə yerləşdirilən bəyanatında deyilir ki, silahlılar sahil Mpeketoni şəhərində mehmanxanalara, polis məntəqələrinə, banklara və başqa ictimai obyektlərə hücum ediblər. Öldürülənlərin bəziləri futbol üzrə Dünya Çempionatına baxmaq üçün bir yerə toplaşıblarmış.

Xatırladaq ki, "Əl-Qaidə"yə bağlı radikal islamçı qruplaşma Keniyada çoxsaylı hücumlara görə məsuliyyət daşıyır. Keçən ilin sentyabrında Nayrobidə "İslam" adı ilə ticarət mərkəzində həyata keçirilən hücum zamanı 60-dan çox insan öldürülmüşdü.

Yenə terrorçu vəhhabilər və yenə "İslam" adı ilə qətllər. Ardınca bu cinayətlər haqda xəbərlərin KİV və sosial şəbəkələr vasitəsilə dünyada gündəmə gətirilməsi və geniş yayılması.

Qeyd edək ki, bu hücumların qurbanları əksər hallarda dinc, mülki vətəndaşlar olur. Həm də əksərən elə müsəlmanlar. Lakin müsəlmanlardan daha çox, İslam dininin imici terror qurbanına çevrilmiş olur: “İslam” adı ilə terror aktları törədilir və bu qanlı olaylar dünyanın aparıcı mediasında işıqlandırıldıqda, istər-istəməz İslam adı da hallandırılır. Nəticədə ictimai rəydə dinimiz haqqında mənfi və qorxunc rəy formalaşır.

“İslam” sözünün kökündə “silm” – yəni “sülh” sözü dayansa da, günahsız bir insanın qətli Qurana görə, bütün bəşəriyyətin qətli və böyük günah kimi səciyyələndirilsə də, radikal vəhhabilərin törətdikləri bu qanlı cinayətlər sayəsində İslam dini zorakılığa sövq edən bir din kimi tanınmağa başlayır.

Bu baxımdan, əslində, radikal vəhhabilərin din adı ilə törətdikləri terrorlar məhz İslam və müsəlmanlara qarşı açılmış bir cəbhə kimi xarakterizə edilməlidir. Belə isə, ilk növbədə elə İslam aləmi bu terrorçuluğa qarşı səfərbər olub mübarizə aparmalı, bu tendensiyanın qarşısını almalıdır.

Bütün müsəlman toplumları radikal vəhhabiliyi cəmiyyətdən təcrid edib, İslam və müsəlmanlığın adını bu cinayətkarlıq ləkəsindən təmizləməlidir.

Bəs bir müsəlman olaraq, biz öz üzərimizdə bu öhdəliyi hiss edirikmi?

İslam.az