Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə Novruz bayramı münasibətilə Azərbaycan xalqını təbrik edib.

QMİ-nin mətbuat xidmətindən APA-ya daxil olan təbrikdə deyilir: "Əsrlər boyu torpağın oyanışının, təbiətin yeniləşməsinin rəmzi olan Novruz həyatımıza yeni ab-hava, süfrələrə xeyir-bərəkət bəxş edir. Vətən torpağı baharın nəfəsindən oyandıqca bizləri yeni xoş əməllərə, nəcib və xeyirxah işlərə rövnəqləndirir.

Allahın yaratdığı torpağın, təbiətin intibahını tərənnüm edən Novruz, eyni zamanda, Uca Yaradana sonsuz məhəbbəti, Onun nemətlərinə şükür-sənanı özündə ehtiva edir, Novruz xəlq olunmuşların ən alisi olan insanın ruhuna təbiətlə vəhdətdə təkamül səadəti bəxş edir. Novruzun dini baxımdan əhəmiyyət kəsb edən məqamlarla da üst-üstə düşməsi bu bayramın mübarəkliyini daha da artırır. Odur ki, biz, dindarlar üçün Novruz həm də dini bayramdır. İnsanlara xeyirxahlıq və şəfqət təlqin edən Novruz bayramı günlərində valideynlərə, qohum-əqrəbaya baş çəkilməsi, küsülülərin barışması, yetim, kimsəsiz və ehtiyacı olanlara diqqət göstərilməsi, dünyasını dəyişmiş yaxınların qəbirlərinin ziyarəti bəyənilən əməllərdəndir.

Allaha çox şükürlər olsun ki, hər yeni Novruz dövlətimizin və xalqımızın uğurlu, davamlı inkişaf yoluna rəvac verir, Qarabağda qələbəmizə əzmimizi daha da artırır. Bu əziz gündə Allahdan diləyim budur ki, Öz Mərhəmət və Kəramətini xalqımızın, dövlətimizin üzərində daima bərqərar etsin, müstəqilliyimizin daha da möhkəmlənməsi, ərazi bütövlüyümüzün bərpası uğrunda səy göstərən dövlət başçımızın müdrik rəhbərliyi ilə işğal altında olan torpaqlarımızın azad olunmasını, bu əziz bayramı doğma Qarabağda keçirməyi bizlərə tezliklə qismət etsin.

Əziz həmvətənlərim! Bu il, inşallah, martın 20-də sat 21:31 dəqiqə 40 saniyədə təhvil olacaq. Bayram axşamı martın 20-sinə, bayramın günü martın 21-ə təsadüf edir. Elimizin bu əziz günündə sizi bir daha Novruz bayramı münasibəti ilə ürəkdən təbrik edir, hamınıza Uca Yaradandan fərəh dolu günlər, süfrələrinizə ruzi-bərəkət, evlərinizə səadət diləyirəm. Qoy Allah Novruzun qədəmlərini mübarək etsin!"