İçərişəhərdə XI əsrin abidəsi olan "Məhəmməd" məscidində bərpa və konservasiya işlərinə başlanılıb.

Azərbaycan Respublikasının Nazirlər Kabineti yanında "İçərişəhər" Dövlət Tarix-Memarlıq Qoruğu İdarəsindən APA-ya verilən məlumata görə, bərpa və konservasiya İçərişəhərin Konservasiyası üzrə Master Plana uyğun aparılacaq və Avstriyanın məşhur bərpaçı mütəxəssisi, dünyanın müxtəlif yerlərində 400-dən artıq abidəni bərpa etmiş Erik Pummerin rəhbərliyi ilə onun emalatxanasının əməkdaşları və yerli mütəxəssisləri tərəfindən "Remmers" şirkətinin bərpa üçün nəzərdə tutulmuş xüsusi materiallarından istifadə etməklə həyata keçiriləcək. Bərpa işlərinə hazırlıq ötən ildən başlanıb. Öncədən xarici mütəxəssislər tərəfindən abidənin vəziyyətinin diaqnostikası və ölçmə-tədqiqat işləri aparılıb və əldə olunmuş nəticələrə əsasən onun bərpa metodikası, tətbiq olunacaq texnologiya və materiallar müəyyənləşdirilib. Özündə abidənin zədələnmiş hissələrinin möhkəmləndirilməsi, səthinin sintetik qranulyatla təmizlənməsi, asan həll olunan duzların (sulfat və nitratların) reduksiyası kimi mərhələləri ehtiva edən mürəkkəb texnoloji prosesin gedişində təqribən 500 m²-lik səth örtüyü xüsusi avadanlıq və materiallarla bərpa edildikdən sonra konservasiya olunacaq. İşlərin bu ilin sonunadək tamamlanması nəzərdə tutulur. Qarşılıqlı razılaşmaya əsasən, yerli mütəxəssislərin bərpa və konservasiya işləri sahəsində bilik və bacarıqlarının artırılması məqsədilə Avstriyalı mütəxəssislər aparılacaq konservasiya işlərinin gedişində əyani olaraq öz təcrübələri ilə bölüşəcəklər. Bu isə gələcəkdə bu cür işlərin yerli mütəxəssislər və işçi qüvvəsi hesabına həyata keçirilməsinə imkan yaradacaq.

Qeyd edək ki, məscid giriş qapısının üzərindəki epiqrafik yazıya əsasən (ərəb kufi xətti) hicri tarixi ilə 471-ci ildə (miladi 1078-79) ustad rəis Məhəmməd Əbubəkr oğlu tərəfindən inşa olunub. I Pyotrun Bakıya kəşfiyyat üçün göndərdiyi rus donanmasının admiralı Matyuşkinin göstərişi ilə şəhərin dənizdən top atəşinə tutulması nəticəsində minarəsinin yuxarı tərəfi dağıldığı üçün məscid "Sınıqqala" adlanır. 1988-ci ildə aparılmış arxeoloji qаzıntılаr zamanı məscidin gözlənilməz irihəcmli sаhə quruluşu kəşf еdilib, ibаdət zаlının аltındаn dаş çаtmа qübbə ilə örtülmüş аnаlоji tipli оtаq аşkаr оlunub. Məscidin islаmаqədər fəаliyyət göstərən daha qədim ibadət ocağının bünövrəsi üzərində ucаldıldığı güman edilir.