Tədbirdə Mövlana Cəlaləddin Rumi ilə bağlı çəkilən bir saatlıq "Səma göstərişi" adlı film də nümayiş etdirilib

Bu gün Dövlət Filarmoniyasında 13-cü əsrdə yazıb-yaratmış müsəlman alimi və şairi Mövlana Cəlaləddin Rumiyə həsr olunmuş "Mövlana günləri"nin təntənəli açılış mərasimi keçirilib. Gecədə mədəniyyət və turizm naziri Əbülfəz Qarayev, Yazıçılar Birliyinin sədri Anar və digər ziyalılar iştirak ediblər. Əbülfəz Qarayev "Mövlana günləri"nin YUNESKO-nun təklifi ilə bütün dünyada qeyd edildiyini bildirib: "Mövlana Cəlaləddin Rumi türk-islam mədəniyyətinin bəşəriyyətə bəxs etdiyi ən nadir simalardan, söz-təfəkkür ustadlarından biridir. Bu mənada onun anadan olmasının 800 illiyinin YUNESKO çərçivəsində qeyd olunması heç də təsadüfi deyil. Mövlananın bədii-fəlsəfi irsi Milli mənsubiyyətindən, dilindən, irqindən, cinsindən asılı olmayaraq bütün insanlar üçün böyük dəyər daşıyır. Çünki o, insanlar arasında sevgi, məhəbbət, qardaşlıq hisslərini tərənnüm edir. YUNESKO Mövlana günlərinin bəşəriyyətin bayramına çevrilməsinə qərar verib. Mövlana bayramınız mübarək!".

Nazir bildirib ki, böyük sənətkarın 800 illik yubileyinin Azərbaycanda da geniş şəkildə qeyd olunması türk dünyasının tarixi-mədəni dəyərlərinin dirçəldilməsi baxımından son dərəcə qiymətlidir.

Yazıçılar Birliyinin sədri Anar da Mövlana Cəlaləddin Ruminin böyüklüyündən, əsərlərinin fəlsəfəsindən söz açıb.

Gecədə həmçinin azərbaycanlı rejissor Tofiq İsmayılovun Mövlana Cəlaləddin Rumi ilə bağlı çəkdiyi bir saatlıq "Səma göstərişi" adlı film nümayiş etdirilib. Filmin ssenari müəllifi Rəfael Hüseynovdur.

Tədbirdə həmçinin Yazıçılar Birliyi tərəfindən bir neçə ay əvvəl elan edilən "Birlikdə yaşamaq sənəti və Mövlana Cəlaləddin Rumi" mövzulu şeir, hekayə və elmi məqalə müsabiqəsinin nəticələri elan olunaraq qaliblər mükafatlandırılıb.

Qeyd edək ki, "Azərbaycanda Mövlana Cəlaləddin Rumi günləri" Mədəniyyət və Turizm Nazirliyinin, Azərbaycan Yazıçılar Birliyinin, Konya Böyükşəhər Bələdiyyəsinin və "NAB" Şirkətlər Qrupunun təşkilatçılığı ilə keçirilir.