Silsilə tədbirlər oktyabrın 25-nə kimi davam edəcək

Bu gün "Azərbaycanda Mövlana günləri" çərçivəsində silsilə tədbirlərin açılış mərasimi keçirilib. Açılış Müasir İncəsənət Mərkəzində baş tutub. Tədbirin açılışında Türkiyədən Konya Böyükşəhər bələdiyyəsinin, Azərbaycandan Rəssamlar İttifaqının nümayəndələri iştirak edib. Onlar Mövlana sənəti səma göstərisi haqqında danışıblar.

Açılış mərasimindən sonra isə sərgi keçirilib. Sərgidə Konya Böyükşəhər Bələdiyyəsinin kolleksiyasından 40 əsər nümayiş edilib. Kolleksiya Faik Özdengülün qələmə aldığı 40 hissəli "Aşkın terapii" əsərinin illusturasiyalarından ibarət olub.

Tədbir çərçivəsində ikinci sərgi Bakı İncəsənət Mərkəzində baş tutub. Burada məşhur xəttat Tərlan Qorcinin əsərləri nümayiş olunub. Rəsam bildirib ki, bu sərgi iki il əvvəl ilk dəfə Varşavada nümayiş etdirilib: "Sərginin iki özəlliyi var: 1. Sərgi abstrakt koleoqrafiya şəklindədir. Burada heç bir sözdən istifadə edilmir. 2. Əsərlər əllə yox, kompüter vasitəsi ilə yaradılıb. Onlar hamısı rəqəmli koleoqrafiyadırlar".

Sərgidə Mövlananın məsnəvisinin orijinalı da nümayiş etdirilib. Bildirilib ki, bu kitabda 25 618 beyt məsnəvi var ki, onlardan 18-ni Mövlana özü yazıb. Yerdə qalanlarını isə mürşidləri köçürüblər.

Açılış tədbiri çərçivəsində üçüncü sərgi Müasir İncəsənət Mərkəzində keçirildi. Sərgidə İran və Azərbaycan sənətkarlarının əsərləri nümayiş etdirilib.

Qeyd edək ki, tədbirlər oktyabrın 21-25 aralığında davam edəcək.