Bu gün publika.az saytında bəzi ekspertlərə istinadən Suriyada Bəşər Əsəd tərəfində Azərbaycan vətəndaşlarının iştirak etdiyini iddia edən “Bəşər Əsədin azərbaycanlılardan ibarət ordusu” başlıqlı məqalə dərc olunub (http://publika.az/p/5451). Yazıda istinad edilən ekspertlər və mənbələr iddia edir ki, “İranda azərbaycanlılardan ibarət Əsəd ordusu yaradılır”. Daha sonra bilidirilir ki, guya Suriyada azərbaycanlılar azərbaycanlılara qarşı vuruşur: “Ən maraqlı iddia isə Əsəd ordusunda vuruşmaq üçün yaradılan hərbi bölmələrdə farsların olmamasıdır. Mənbə bildirir ki, bu bölmələrdə Bakının Nardaran və digər kəndlərindən, eləcə də cənub bölgəsindən olanlar, Cənubi Azərbaycandan olan azərbaycanlılar … var”.

İslam.az toxunulan mövzunun aktuallığını nəzərə alaraq özü də bu sahədə araşdırma aparıb.

Əvvəla xatırlatmaq yerinə düşər ki, publika.az saytında dərc olunan məqalədə səslənən iddialara bənzər versiyalar daha öncə də yerli mediada ara-sıra yer alırdı. Hətta guya Suriyada həlak olan 6 Nardaran və Maştağa sakinlərinin adlarından ibarət siyahı da tərtib olunmuşdu. Amma bütün bu iddialar sonradan təkzib olundu. Əvvəlcə Azərbaycan Daxili İşlər Nazirliyi Bəşər Əsədin tərəfində hərbi əməliyyatlarda iştirak məqsədi ilə Nardaran və Maştağa qəsəbəsindən bir qrup şəxsin Suriyaya getməsi barədə KİV-lərdə yayılan məlumatı təkzib etdi. Bu məlumat qəsəbələrə nəzarət edən Sabunçu Rayon Polis İdarəsi tərəfindən də təkzib olundu. Eyni zamanda adı hallanan qəsəbələrin sakinləri bildiriblər ki, öldürüldüyü iddia olunan insanların adları onlara tanış deyil və qəsəbələrdə belə şəxslər heç vaxt yaşamayıblar.

Daha sonra isə Nardaran Ağsaqqallar Şurasının sədri Natiq Kərimov virtualaz.org saytına bu iddiaların həqiqət olmadığını deyib. N.Kərimov bildirib ki, Nardarandan Suriyaya döyüşməyə gedənlərlə bağlı hər hansı fakt yoxdur: “Nardarandan Suriyaya döyüşməyə gedənlərin olması haqda fikirlər səsləndirilir. Amma ortada bununla bağlı heç bir fakt yoxdur. Suriyada ölənlər və ya yaralananlar arasında Nardarandan kiminsə olması xəbərini də nə eşitməmişik, nə də görməmişik. Bu iddialar absurddur. Kimlərsə məsuliyyəti öz üzərindən atmaq, məsuliyyətdən yayınmaq üçün Nardaran və Maştağanın adını çəkir. Bakı kəndlərinin adının bu məsələlərdə hallandırılmasını düzgün saymıram”.

Nardarandan olan ilahiyyatçılar da azərbaycanlıların Suriyaya yollanaraq Əsəd ordusunda savaşması xəbərlərini yalandılar.

Təbii ki, belə bir mənzərə yarandıqda meydana sual gəlir: bəs bu iddialar haradan qaynaqlanır və nə məqsəd güdür? Bununla bağlı bizim də müraciət etdiyimiz ekspertlərin cavabı təxminən belə oldu – kimlərsə sadəcə fikri sələfi təkfirçilərdən yayındırmaq, cəmiyyətdə dini zəmində qarşıdurma əhval ruhiyyəsi yaratmaq, Suriyada döyüşən təkfirçilərə bəraət qazandırmaq məqsədi ilə mətbuatı bu istiqamətə yönləndirmək, mətbuata bu tipli dezinformasiyalar ötürməklə onları yanlış izə istiqamətləndirməklə məşğuldurlar.

Ekspertlərin fikrincə mətbuata bu kimi əsası olmayan məlumatların “fakt” kimi sızdırılmasında isə 3 qüvvə maraqlı ola bilər:

1. Sələfi təkfirçilərin özləri. Bu hərəkətləri ilə onlar əslində törətdikləri cinayətlərə bəraət qazandırmağa çalışır, fikri özlərindən yayındırırlar.

2. Müxtəlif strukturlara sızmış sələfilərin havadarları olan bəzi məmurlar və digər səlahiyyətli şəxslər.

3. Suriya hökumətinə qarşı bütün bu müharibəni təşkil edərək təkfirçi cinayətkarların ora getməsinə şərait yaradan beynəlxalq qüvvələr.

Bütün bu qruplara daxil olanlar bir məqsəd güdür: təkfirçilərə haqq qazandırmaq və ictimai qınaq nəticəsində yaranmış zərbəni onlardan yayındırmaq. Hər 3 qüvvə hazırda bu istiqamətdə ciddi səylə çalışır.

Dediklərimizi təsdiqləmək üçün belə məlumatları ötürən mənbələrin müəlliflərinə baxsaq yetər. Belə məlumatlar ya saytların, qəzetlərin elektron ünvanlarına anonim şəklində, heç bir fakta söykənmədən, yalnız iddia şəklində gəlir, ya da təkfirçi yönü və ya qərbpərəstliyi ilə tanınan şəxslər tərəfindən elan edilir. Yenə də faktsız və iddia formasında.

Bütün bunları yekunlaşdıraraq, oxuculara müraciət etmək istərdik. Hər kəs istənilən məlumatı oxuduqda diqqətli olsun, ən azından cüzi analiz etsin: bu xəbər nə dərəcədə həqiqəti əks etdirir? Bu xəbərin mənbəyi nədir, kimdir? Yoxsa “adını açıqlanmasını istəməyən”, “anonim”, “etibarlı” mənbələrə istinad edərək çox yalanlara həqiqət donu geyindirmək mümkündür. Eyni zamanda mətbu orqanlarına da məsləhət etmək istəyirik ki, belə məlumatları yayarkən mənbələri yoxlasınlar və ən azından bunu “fakt” kimi yox, iddia kimi təqdim etsinlər. Çünki, hələ ki, bunlar iddiadan başqa bir şey deyil.

islam.az