Xəbər verdiyimiz kimi yanvarın 28-də Azərbaycanın Qazilər Şurasının xüsusi iclasında qeyri-ənənəvi təriqətllərin, radikal cərəyanların təxribat xarakterli, cəmiyyətdə sabitliyi pozan təbliğatlarına qarşı fətva verilib. İclasda Qafqaz Müsəlmanları İdarəsinin (QMİ) sədri Allahşükür Paşazadə də bu cür radikalların ictimai əmin-amanlığı pozmağa yönəlmiş idayelarından danışaraq, kəskin çıxışlar edib. Əsasən vəhhabilik, xəvaricilik, sələfilik, nurçuluq, təkfirçilik cərəyanlarının adları vurğulanıb. Çox keçmədən onun fikirləri və umumilikdə Qazilər Şurasının verdiyi fətva nəinki ölkədaxili radikalları narahat etdi, hətta deyəsən nurçu təriqətinin nümayəndələrini də qəzəbləndirdi.

Belə ki, özünü “Fətullah Gülən sevdalıları” adlandıran qrupun elektron poçt ünvanından mətbuata Allahşükür Paşazadəni hədələyən məktublar göndərilib.

Məktub QMİ sədrinin ərəb ölkələrinin fondları, siyasətçi və iş adamları ilə əlaqələrindən bəhs olunur. Yazının girişində Şeyxin vəhhabi və nurçulardan çox danışdığı qeyd olunur və QMİ sədrindən vəhhabilərdən aldığı pulların hesabını verməsi tələb olunur. Daha sonra isə Şeyxülislamın müxtəlif ünvanlardan pul alması ilə bağlı rəqəmlər qeyd olunur:

1. Küveytli biznesmen Əbdül Əziz Batendən Xırdalanda İslam Universiteti tikmək üçün 500 min dollar almısan. Hanı Universitet, hanı pullar?

2. Bəhreyn krallığı vətəndaşı Əbu Süleymandan qaçqınlara yardım üçün aldığın 1 milyon dollar. Əbu Süleyman “əl-Qaidə” ilə bağlı olduğu üçün ABŞ tərəfindən həbs edilmişdi.

3. Səudiyyə daxili işlər naziri Nayif bin Əbdül Əzizdən aldığın 700 min dollar nə üçün idi? Səudiyyə daxili işlər naziri ilə nə əlaqən?

4. Səudiyyəli iş adamı Abdullahdan aldığın 800 min dollar qaçqınlara paylanıldı, yoxsa özünə villa tikdin?

5. “Nur camaatı”ndan aldığın 250 min dollar. Məscid sözü verdin, amma yedin pulu.

Yazıda həmçinin Şeyxülislam təhdid olunub ki, daha danışmasın, yoxsa daha artıq ifşa ediləcək.

İslam.az-ın məlumatına görə, Modern.az saytına QMİ sədri Allahşükür Paşazadənin qardaşı, deputat Cavanşir Paşazadə qardaşına qarşı yayılan kompramatlara münasibət bildirərkən bunların yalan olduğunu deyib:

“Qafqaz Müsəlmanları İdarəsinin bəyanatı hardasa Azərbaycandakı vəhhabilərə toxunub. Azərbaycanda gizli pərdə altında vəhhabilik inkişaf edib. İdarənin bəyanatları həmin radikal dini cərəyanların nümayəndələrinə sərf etmir. Onlar Şeyxulislam Allahşükür Paşazadənin dediklərinə əks mövqedə dayanıblar”.

“Bu adamlara vəsaitin haradan ayrıldığı bilinir. Onlar birbaşa Səudiyyə Ərəbistanından maliyyələşir. Dünya bilir ki, bunlar başqa-başqa dövlətlərdən, həmçinin Səudiyyə Ərəbistanından geniş şəkildə istifadə edirlər. Müsəlmanlar İdarəsi hansı formada Səudiyyə Ərəbistanından istifadə edə bilər axı?”- deyə Cavanşir Paşazadə mətbuatda QMİ rəhbərinin Səudiyyə Ərəbistanından pul alması barədə yazılanları tənqid edib.

Millət vəkili onu da bildirib ki, Azərbaycanda olan vəhhabi cərəyanının iç üzü açıldığı üçün onlara bəzi məsələləri xatırlatmaq sərf etmir. O qeyd edib ki, vəhhabilər Azərbaycan dövlətinin  radikal cərəyanlara qarşı qanuni şəkildə işlər aparacağını bildiyindən təxribatlara əl atırlar.

“Azərbaycan dövləti, azərbaycançılıq əleyhinə dünyada müxtəlif diaspor təşkilatları fəaliyyət aparır. Bu da onların bir formasıdır”.

Qeyd edək ki, bu kompromatı yayanların nurçular deyil, məhz vəhhabilərin olması ehtimal olunur.