Mətbuatda, siyasi dairələrdə, dini qurumlarda vəhhabilərin Azərbaycanın dini tolerantlığına, sosial və siyasi sabitliyinə təhlükə olması barədə çox yazıldı.

Yazılanları, deyilənləri təkrarlamaq fikrim yoxdur. Artıq məsələ ilə bağlı Daxili və Xarici İşlər nazirlikləri, Qafqaz Müsəlmanları İdarəsi, Dini Qurumlarla İş üzrə Dövlət Komitəsi və digər qurumlar öz mövqelərini ortaya qoyublar.

Deyilənlərin əsas və ortaq nöqtəsi budur ki, din pərdəsi altında missionerliklə məşğul olan bu terror təhlükəli cərəyan üzvlərinin əl-qollarını bir yerə yığıb sakit durmalıdırlar. Əks təqdirdə nəticə ilə özləri hesablaşmalı olacaqlar. Bununla bağlı qanuni çərçivədə addımlar atılacağı barədə lazımi qurumlar tərəfindən sərt xəbərdarlıq da edilib.
Çirkli oyunlar içində Cənnət vədi...

Dini məzhəblər, sünnilər və şiələr arasında nifaq yaradaraq ölkədə dini qarşıdurma yaratmaq istəyən bu insanların artıq xarici qüvvələr tərəfindən maliyyələşdirildiyi də hamıya məlumdur.

Suriyanı cihad məkanına çevirən, guya ki Cənnətə düşəcəyindən əmin olaraq özünü güllə qarşısına atan, müsəlmana kafir adı qoyub, onu göz qırpmadan qətlə yetirən bu insanlar hələ də çirkli oyun içərisində olduqlarını anlamırlar. Bəlkə anlayırlar, amma geri dönüşlərinin olmadığını bildikləri üçün əməllərindən əl çəkmirlər.

“Qurani Kərim”ə inandıqlarını deyirlər, amma əməlləri öz dediklərini təkzib edir...

“Qurani Kərim”i hər zaman özlərinə rəhbər tutduqlarını deyən vəhhabilərin bu hərəkətlərinə elə “Qurani Kərim”də baxaq görək necə qiymət verilir?
Onların Suriyada elan etdikləri “cihad” məsələsinə Allah “Qurani Kərim”də nə buyurub?

Həcc surəsinin 78-ci ayəsində buyurulur ki, “(Ey möminlər!) Allah yolunda layiqincə cihad edin”. Amma Suriyadakı müharibə Allah yolundadırmı? Əlbəttə ki, xeyr. Bu ölkənin iki müxalif qüvvəsinin hakimiyyət savaşıdır. Burada İslam dinini müdafiə etmək üçün savaş elan edilməyib. Əksinə, hazırda orada gedən döyüş, fitnəkar qüvvələr tərəfindən alışdırılan bu ocaq dinimizə ziyan vurur.
Amma görünür onlar bu ziyanı dərk etmirlər.

Bundan başqa Ənam surəsinin 151-ci ayəsində buyurulub: “Allahın (qətlini) haram buyurduğu cana qıymayın (müsəlman və ya əhli-zimməni haqsız yerə öldürməyin). (Allah) bunları sizə tövsiyə etmişdir ki, bəlkə, düşünüb anlayasınız!”.

İndi baxaq Suriyada 3 ilə yaxın müharibədə nə qədər dinc sakinlər, müharibədə iştirak etməyən yerli əhali öldürülüb? Minlərlə, on minlərlə qoca, uşaq, qadın “cihad” adı ilə qətlə yetirilib, insanlar vətənindən didərgin olunub.
Suriya İnsan Hüquqları Təşkilatının məlumatına görə ölkədə müharibə başlayandan sonra 130 mindən çox adam öldürülüb. Onların 61 mindən çoxu mülki vətəndaşdır. Onların da 10 mindən çoxu uşaq və qadınlardır.
Daha bir ayəyə nəzər yetirək. Maidə surəsinin 77-ci ayəsində dində ifrata gedənlər, yolunu azmış qüvvələrin arxasınca gedənlər barədə belə buyurulub:

“De: “Ey kitab əhli! Dininizdə haqsız yerə ifrata varmayın. Əvvəlcə yolunu azmış, bir çoxlarını da azdırmış və doğru yoldan çıxmış bir tayfanın nəfsinin istəklərinə uymayın!”

Müqəddəs kitabımızdan bu kimi ayələr çox gətirmək olar. Nəticə etibarilə Allah müsəlmanlara mehriban və əmin-amanlıq içərisində, fitnə-fəsada uymadan yaşamağı buyurur. Bu ayədə isə demək olar ki, hər şey aydın olur:
“Hamılıqla Allahın ipinə (dininə, Qurana) möhkəm sarılın və (firqələrə bölünüb bir-birinizdən) ayrılmayın! Allahın sizə verdiyi nemətini xatırlayın ki, siz bir-birinizə düşmən ikən o sizin qəlblərinizi (İslam ilə) birləşdirdi və Onun neməti sayəsində bir-birinizlə qardaş oldunuz. Siz oddan olan bir uçurumun kənarında ikən O sizi oradan xilas etdi. Allah Öz ayələrini sizin üçün bu şəkildə aydınlaşdırır ki, haqq yola yönəlmiş olasınız!”
Öz adınızdan niyə imtina edirsiniz?

Son zamanlar vəhhabilərin öz adlarından imtina etməsi halları ilə çox rastlaşırıq.
Onlar deyirlər ki, “biz vəhhabi deyilik və heç vaxt olmamışıq, biz sələfiyik”. Amma nəticə etibarilə ikisi də eyni anlayışdır.
Sadəcə son zamanlar onlara qarşı edilən təzyiqlərə görə öz adlarından imtina etmələrini müəyyən qədər başa düşmək olar. Çünki onlar Azərbaycanı öz məqsədlərini və missiyalarını rahatlıqla tətbiq etmək üçün ən rahat məkan bilirdilər. İndi onların bu rahatlığı pozulduğu üçün öz adlarından imtina etmələri də məhz bununla bağlıdır.
Əgər həqiqətən də əqidənizdə doğrusunuzsa niyə öz adınızdan imtina edirsiniz? Və yaxud da sələfilik deyəndə kimin sələfi olduğunuzu iddia edirsiniz?
Məhəmməd Peyğəmbərimizin (s.a.v.s) sələfi olduğunu iddia edirsinizsə o dinimizdə nifaq salmağı heç vaxt buyurmayıb. O müsəlmanlar arasında düşmənçilik və ədavət yaymağı buyurmayıb.
Peyğəmbərimiz müsəlmanın canına və malına halal kimi baxanlara dəstək verməyib. Onun sələfləri bu kimi əməllər etməz.
Əksinə peyğəmbərimiz belə buyurub: “İnsanlara mərhəmət etməyənə Allah mərhəmət etməz”.
Başqa bir hədisdə belə deyilib: “Müsəlman müsəlmanın qardaşıdır”. Daha Peyğəmbərimiz deməyib ki, müsəlmana düşmən kimi baxın və onu kafir kimi öldürün.
Son söz əvəzi... və ya mücahidlər və şəhidlər kimlərdir?
Bütün bunların yekunu olaraq qeyd etmək lazımdır ki, cəmiyyətimiz həm elmi, həm də dini cəhətdən maariflənməlidir. İnsanlar mövcud təhlükələrin olduğu dövrdə müxtəlif şirin vədələrə uymamalıdır. Qəlbində Allah sevgisi olan şəxs nifaqa düşməməli, haqqı nahaqdan ayırmalıdır. Müsəlmanlar onları ayırmağa çalışanlara qarşı sıx birləşməlidir.
Son zamanlar bir sıra mətbuat orqanları Suriyada vuruşanlarla bağlı mücahid və şəhid kimi ifadələr işlədir.
Dünən Qazılar Şurasının iclasında da Qafqaz Müsəlmanlar İdarəsinin sədri Hacı Allahşükür Paşazadə bu məsələyə toxunub:
“Dindarlarımız rahatlıqla ibadətlərini edir. Azərbaycan öz tolerantlığı ilə bütün dünyada tanınır. Bizdə ənənəvi olaraq süni və şiə məzhəbinin nümayəndələri olub. Sonradan yaradılan dini cərəyanlar isə xarici qüvvələr tərəfindən idarə edilir. Mən elə bilirəm ki, onlar həm də Ermənistana xidmət edən qüvvələrdir.
Düşünmüşəm ki, bəlkə düzələrlər. Adını vəhhabi, sələfi qoyursan, nə qoyursan qoy, öz ibadətini et, vəssəlam. Amma təbliğ və təşviq etmək ölkənin qanunlarına ziddir. Bu kimi hallar qanun çərçivəsində cəzalandırılmalıdır.
Cəmiyyəti maarifləndirmək lazımdır. Vətənə sevmək, qorumaq hər bir vətəndaşın, müsəlmanın borcudur. Lakin burada insanları aldadaraq onlara Cənnət vəd edərək cavan uşaqları xaricə göndərənlər küfr edirlər. Onları ata-analarından ayıranlar necə cavab verəcəklər? Bizim Qarabağ boyda dərdimiz var. Biz qeyrətimizi çəkməliyik. Bu qeyrət qala-qala, Suriyada şəhadət adı ilə getmək şəhidlik deyil. Çox pul qarşılığında Suriyaya gedirlər.
Bu cihad deyil. Orada ölənlər şəhid deyil. Mən inanıram ki, dövlət bununla bağlı lazımi tədbir görəcək”.
Məşədi Dadaş məscidinin imam axundu Hacı Şahin Həsənli isə bu məsələ ilə bağlı belə dedi:
“Azərbaycanda bəzi cərəyanlar məzhəblərarası qarşıdurma yaradır. İstər sünni, istərsə də şiə məzhəblərinin nümayəndələri bu kimi hallara qarşı mübarizə aparmalıdır. Hamı da görməlidir ki, həqiqətən də bu məzhəblərin heç bir cərəyana aiddiyyəti yoxdur”.
Suriyada baş verənlərin müqəddəs müharibəyə, cihada heç bir aidiyyəti yoxdur. Cihad Qurani-Kərimdə işlənmiş sözdür və təcavüzə məruz qalanın özünü qoruması mahiyyətini daşıyır. Yəni hansısa müsəlman xalq təcavüzə məruz qalırsa, torpaqları zəbt olunursa, işğal olunursa, xalqın vəzifəsidir ki, öz dəyərlərini qoruyaraq təcavüzkara cavab versin.
Bunların isə heç birinin bu gün Suriyada baş verənlərlə heç bir əlaqəsi yoxdur. Təəssüf ki, azərbaycanlılar da bu gün oradakı döyüşlərdə iştirak edir. Onlar əslində Qarabağa yollanıb orada cihad elan etməlidirlər”.

Fərid Ədalət
Gün.Az