Xalid ibn Vəlid niyə əhli-sünnə tərəfindən sevilir, amma şiə mənbələrində tənqid olunur?

Xalid ibn Vəlid ziddiyyətli şəxsiyyətə malik bir fiqurdur. İslamı qəbul etməzdən əvvəl müsəlmanların ən qatı düşməni idi, hətta Ühüd savaşındakı məğlubiyyətin əsas səbəbkarı da Xalid olmuşdu. İslamı qəbul etdikdən sonra fəthlərdə fəal iştirak etmiş, Peyğəmbərin sağlığında Mötə savaşında, birinci və ikinci xəlifələrin zamanında isə İran, Suriya, Fələstin fəthlərində fərqlənmişdi. Əhli-sünnə məzhəbində bütün səhabələrə rəğbət fonunda Xalidə də sevgi müşahidə edilir. Hətta Peyğəməbrin onu “seyfullah”, yəni Allahın qılıncı adlandırması barədə hədis də rəvayət edilir ki, şiələr bunu mötəbər saymırlar.

Xalid istər Peyğəmbərin sağlığında, istərsə də vəfatından sonra bəzi kobud səhvlərə də yol vermişdir. Peyğəmbərin tapşırığı ilə Bəni-Cüzeymə qəbiləsini İslama dəvət etmək üçün getmiş, amma qəbilə təəssübkeşliyi üzündən orada yersiz zorakılıqlar törətmiş, buna görə Peyğəmbərin qəzəbinə səbəb olmuşdu. Əbu Bəkrin xilafəti dövründə Xalid Malik ibn Nüveyrənin qəbiləsinə hücum edib onları qətlə yetirmiş və sair cinayətlər törətmişdi. Hətta bunun üstündə Ömərin Xalidi edam etdirmək istəməsi, amma Əbu Bəkrin buna mane olması da rəvayət edilir. Sünni mənbələrində Malik ibn Nüveyrə və dostlarının guya İslamdan döndüyü, bunun üstündə Xalidin onlarla savaşdığı bildirilsə də, şiə rəvayətlərinə görə məsələ Malikin şiə əqidəsində olmasında, Əbu Bəkri xəlifə kimi qəbul etməməsində imiş. Bu səbəblər, eləcə də, Xalidlə İmam Əli (ə) arasında münasibətlərin gərgin olması, hətta Xalidin o həzrəti öldürmək istəməsi barədə hədislərin mövcudluğu üzündən şiə məzhəbində Xalid ibn Vəlidə münasibət müsbət deyil.

İslam.az