Bu gün, may ayının 29-da Goranboy rayonunun Dəliməmmədli qəsəbəsində yenicə inşa edilmiş "Həzrət Əli (ə)" məscidinin hasarlarının sökülməsinə başlanılıb. Qeyd edək ki, məscidin inşası bir il davam edib və artıq tikinti işləri tam başa çatıb.

Məsələ ilə bağlı DEVAMM sədri, insan haqları müdafiəçisi İlqar İbrahimoğlu bildirir ki, "Həqiqətən də DEVAMM-a belə bir məlumat daxil olub. Hal-hazırda baş verənlərin monitorinqini aparırıq. İstənilən halda bu xoşagələn hal deyil və onsuz da vicdan azadlığı sahəsində pisləşmiş vəziyyəti daha da kəskinləşdirəcəkdir. Çox təəssüflər olsun ki, bu dəfə də hər hansı bir izah verilmədən və əhalini məlumatlandırmadan söküntü işləri başlanıb".

Qeyd edək ki, "Həzrəti Əli" məscidi dini icması rəsmi olaraq Azərbaycan Respubliksaının Dini Qurumlarla İş üzrə Dövlət Komitəsində qeydiyyatdan keçib və Komitədə qeydiyyatdan keçmiş dini icmalar reyestrində 399-cu yerdə gedir.
Onu da bildirək ki, Azərbaycanda son bir ay müddətində artıq üçüncü məsciddir ki, sökülməyə məruz qalır.

Buna qədər Yasamal rayonu Murtuza Muxtarov 130-da yerləşən "Peyğəmbərimiz Muhəmməd (s)" məscidi və Neft Daşlarındakı məscid sökülüb. // Dəyərlər