Dünən Qafqaz Müsəlmanları İdarəsinin (QMİ) sədri Hacı Allahşükür Paşazadə Vatikanın Gürcüstan və Azərbaycandakı nunsisi Klaudio Qucerottini qəbul edib (APA). Qərargahı Tbilisidə yerləşən nunsi Azərbaycana bu səfərinin Papa XVI Benediktin tapşırığı əsasında həyata keçirildiyini deyib. Onun sözlərinə görə, Papa XVI Benedikt dinlərarası münasibətlərin qorunub saxlanmasına çalışdığı üçün Qafqaz şeyxinə minnətdarlığını çatdırmağı xahiş edib. K.Qucerotti Avropa qəzetlərində Məhəmməd peyğəmbərin karikaturalarının nəşr olunmasından təəssüfləndiklərini söyləyib: "Bu məsələyə Vatikanda sərt reaksiyamız oldu. Bu olayları pisləyən bəyanat verdik". Nunsi Avropa qəzetlərində baş verənlərlə bağlı A.Paşazadənin mövqeyinin yüksək qiymətləndirildiyini deyib.

O, Qafqaz şeyxinin düzgün mövqeyi sayəsində Azərbaycanın dini tolerantlığın səviyyəsinə görə, dünyada şöhrət qazandığını bildirib. K.Qucerotti bu xidmətlərinin müqabilində A.Paşazadənin Papa XVI Benedikt adından Vatikanın ən ali mükafatlarından biri ilə təltif olunduğunu söyləyib. QMİ sədri Papa tərəfindən belə bir mükafatla təltif edilməsini yüksək qiymətləndirib. O, bu mükafatı Azərbaycan xalqının dini dözümlülüyünə verilən qiymət kimi dəyərləndirib. Məhəmməd Peyğəmbərin Avropa qəzetlərində karikaturalarının dərc olunmasına bir daha münasibət bildirən şeyx bildirib ki, bu işdə daha çox siyasi məqsəd güdülüb: "Hesab edirəm ki, bu işdən siyasi məqsədlər üçün istifadə edənlər istəklərinə çatıblar. Biz dinlərarası dialoqun yeni formasını tapmalıyıq ki, bura siyasətçilər girə bilməsinlər". Tədbirin sonunda A. Paşazadə Papa XVI Benediktin adından dini tolerantlığı inkişaf etdirdiyinə görə, Vatikanın ali mükafatlarından biri ilə təltif edilib.