Milli Məclisin bugünkü iclasında söz alan deputat İqbal Ağazadə məscidlərin müəmmalı şəkildə bağlanması və bu barədə ictimaiyyətə açıq informasiya verilməməsindən şikayətlənib. O qeyd edib ki, son günlər məscidlərin bağlanması xəbəri dindarlar arasında narazılığa, ajiotaja səbəb olub: "Əgər məscidlərdə təmir işləri aparılırsa, onlar müvəqqəti bağlanırsa, informasiyanı gizlətmək lazım deyil".

Vitse-spiker Bahar Muradova İ.Ağazadəyə cavab olaraq bildirib ki, son illər Azərbaycanda həm dindarlara, həm də dinlərə diqqət artıb: "Nə üçün son illər dövlətin qayğısı hesabına təmir olunan məscidlərdən, işlərdən danışılmır? Bir məscid təmir olunmaq üçün müvəqqəti bağlanır, buna görə Milli Məclisin yüksək tribunasından istifadə edirsiniz. Deputatların səlahiyyəti var ki, istənilən məsələ ilə bağlı əlaqədar qurumlara sorğu ilə müraciət edib cavab alsınlar".

Spiker Oqtay Əsədov B.Muradovanın fikri ilə şərik olduğunu deyib: "Milli Məclisin 3-cü çağırışının 4-cü ilindəyik. Hər kəs mikrofondan istifadə edib nəyisə aləmə car çəkməməlidir. Öz səviyyəmizi qaldırmalıyıq".