Dini qanunlara qismən əməl edən adamı müsəlman ya mömin saya bilərikmi?

İnsanın müsəlman sayılması üçün kəlmeyi-şəhadəti söyləməsi və İslamın əsas əqidə, ibadət qanunlarına hörmətsizlik etməməsi kifayətdir. Belə adamı müsəlman hesab etməyə və onunla müsəlman kimi davranmağa borcluyuq. Həzrət Mühəmməd Peyğəmbər (s) buyururdu ki, mənə Allah tərəfindən buyurulub ki, insanlarla Allahın vahidliyini təsdiq etdikləri zamana kimi vuruşum.

Bundakı sonrakı məsələlər imanla bağlıdır. İnsan dinin qayda-qanunlarına, şəriət hökmlərinə, əxlaq normalarına nə qədər ciddi əməl etsə, imanı o qədər artar. İnsanın imanının dərəcəsini yalnız Allah bilir. Və Allah bunu öz istədiyi bəndələrə (məsələn, peyğəmbərlərə) çatdıra da bilər. Peyğəmbərin sağlığında bir il hər yeri qəhətlik bürüdü. O vaxta qədər müşrik olan bir bədəvi ərəb qəbiləsinin üzvləri Mədinəyə gəlib, Peyğşmbərin hüzurunda kəlmeyi-şəhadəti dedilər və imana gəldiklərini söylədilər. Üstəlik, Peyğəmbərin boynuna minnət də qoydular ki, biz başqa müşrik qəbilələr kimi müsəlmanlarla savaşmamışıq. Onların əsıl məqsədi aclıqdan xilas olmaq və ərzaq almaq idi. Bu münasibətlə aşağıdakı ayə nazil oldu: “Bədəvi ərəblər: “Biz iman gətirdik!” – dedilər. De: “Siz iman gətirmədiniz! Ancaq: “Biz islamı qəbul etdik!” – deyin. Hələ iman sizin qəlblərinizə daxil olmamışdır...” (Hücürat, 14).

Büün möminlər müsəlmandırlar, amma bütün müsəlmanlar heç də mömin deyillər. Hədislərdə buyurulub ki, İslam Məkkədəki Məscidül-həram kimi, iman isə Kəbə kimidir. Kim Məscidül-həramda olsa, o demək deyil ki, Kəbənin içindədir. Amma kim Kəbənin içindədirsə, deməli, o həm də Məscidül-həramdadır.

Kamil mömin odur ki, bütün düşüncələri, əməl və davranışları İslama uyğun olsun. Kimin əqidəsi daha sağlam, ibadəti daha möhkəm, əxlaqı daha təmizdirsə, onun imanı da daha çoxdur.

İslam.az