Bakı Dövlət Universitetinin (BDU) yataqxanalarının yerləşdiyi ərazidəki ("Tələbə şəhərciyi") məscidin fəaliyyəti iki gündən sonra dayandırılacaq. Bu barədə Lent.az-a məlumat verən mənbə bildirib ki, məscidin imamı mayın 19-da camaat namazında ibadət ocağının bağlanması barədə xəbərdarlıq aldığını bildirib.

Daha çox "İlahiyyət camisi" kimi tanınan məscidin imamı, Türkiyə vətəndaşı İbrahim Memiş Lent.az-a faktı təsdiqləyib: "Məni mayın 19-da Bakı Şəhər Baş Polis İdarəsinə dəvət etdilər. Orada bildirildi ki, Bakı Dövlət universitetinin rektoru Abel Məhərrəmov məscidin qanunsuz tikilməsi və fəaliyyət göstərməsi barədə idarəyə şikayət edib. Bildirdilər ki, məscid fəaliyyətini dayandırmalıdır. Biz cümə namazında məscidin bağlanmasını elan etmək üçün mayın 22-dək vaxt istədik. Mayın 22-də cümə namazından sonra məscid fəaliyyətini dayandıracaq. Bu məscid də Şəhidlər Xiyabanının yaxınlığındakı "Şəhidlər" camisi kimi Türkiyə Diyanet İşləri Vəqfi tərəfindən tikilib".

Məscidin qanunsuz tikilməsi və fəaliyyət göstərməsi barədə imamın öz fikirlərinə gəlincə, İ.Memiş bunları deyib: "Qanunsuz bu boyda tikili ucaltmaqmı olar?"

Azərbaycanın Dini Qurumlarla İş üzrə Dövlət Komitəsinin mətbuat xidmətinin rəhbəri Yaqut Əliyeva Lent.az-a bildirib ki, sözügedən məscidin sənədləri qaydasında deyil: "Tövsiyə olunub ki, sənədləri qaydasına salınsın. Məscidin bağlanması ilə bağlı heç bir göstəriş verilməyib".

Türkiyənin Azərbaycandakı səfirliyinin Din müşavirliyindən Lent.az-a verilən açıqlamada məsələdən xəbərdar olduqlarını bildiriblər. Lakin məsələyə şərh verilməyib.

Lent.az məsələyə münasibət öyrənmək üçün Türkiyənin Azərbaycandakı səfirliyinin mətbuat xidmətinə də müraciət edib. Səfirlikdən Lent.az-ın məscidin fəaliyyətinin dayandırılması ilə bağlı sorğusuna qısa cavab bildirilib: "Səfirliyə bu məsələ ilə bağlı hər hansı məlumat daxil olmayıb".