"Neft daşları"nda məscidin sökülməsi barədə heç bir məlumatım yoxdur. Şəhərdən kənarda olduğum üçün bunu ilk dəfə sizdən eşidirəm". Qafqaz Müsəlmanları İdarəsinin Qazilər Şurasının üzvü, Bakı İslam Universitetinin rektoru Hacı Sabir Həsənli "Media forum" saytına açıqlamasında belə deyib.

O bildirib ki, Allah evi adı ilə ucaldılan bina heç vaxt sökülməməlidir: "Məscidlərimiz hər hansı məmurun göstərişi ilə sökülürsə, bu artıq başqa bir problemdir. Mən Qafqaz Müsəlmanları İdarəsinin Qazilər Şurasının üzvü, idarənin rəhbərlərindən biri, ümumiyyətlə bir dindar insan kimi məscidlərin sökülməsinə çox pis baxıram. Harda olur-olsun, əgər bina Allah evi adı ilə tikilibsə, orada ibadət edirlərsə, onun sökülməsinin qəti əleyhinəyəm. Yadımdadır ki, Əbu Bəkr məscidinin söküləcəyi barədə xəbərlər gəzəndə Qafqaz Müsəlmanları İdarəsinin sədri, şeyxülislam Hacı Allahşükür Paşazadə keçirdiyi mətbuat konfransında məscidlərin sökülməsinə çox mənfi münasibətdə olduğunu bildirmişdi. Demişdi ki, orda kimin namaz qılmağından asılı olmayaraq məscid sökülə bilməz. Yəni kiminsə günahını tarixi abidə çəkməməlidir".

Hacı Sabir bugünlərdə şeyxülislamla məscidlərin sökülməsi məsələsi ətrafında söhbət etdiyini də deyib: "Söhbətimizdə ikimiz də məsələyə eyni mövqedən yanaşdıq. Yəni biz bu fikirdəyik ki heç bir məscidin sökülməsinə tərəfdar ola bilmərik".

Xatırladaq ki, "Neft daşları"ndakı məscid müstəqillik dövründə Azərbaycanda hökumətin qərarı ilə sökülən üçüncü məsciddir.

Müstəqillik dövründə hakimiyyət qurumunun məscidi sökməsi hadisəsi ilk dəfə 2001-ci ildə baş verib. Xətai Rayon İcra Hakimiyyətinin göstərişi ilə Səmədağa Mehmandarov küçəsində tikilən məscid binası dağıdılıb (həmin məscid sonradan fəaliyyətini bərpa edib).

İkinci belə hadisə 2009-cu ilin aprelində olub. Yasamal Rayon Məhkəməsinin rayon icra hakimiyyətinin iddiası əsasında çıxardığı qərara əsasən, Murtuza Muxtarov küçəsindəki məscid sökülüb. // Mediaforum