Milli Məclisin son iclasında YAP-çı deputat Siyavuş Novruzovun dini mərasimlər, Qafqaz Müsəlmanları İdarəsi haqda dedikləri, həmçinin digər deputatların qəbristanlıqda yerlərin pulla satılması məsələsinə münasibət bildirməsi Azərbaycan İslam Demokrat Partiyasının (AİDP) narazılığına səbəb olub.

Partiyanın sədri hacı Tahir Abbaslı məsələ ilə bağlı belə deyib: "Parlamentin son iclasındakı çıxışlar göstərdi ki, bəzi deputatlar din haqqında təsəvvürləri olmamaqla bərabər, həm də özlərinin bildiklərini cəmiyyətə din kimi təqdim etmək, dindən dərs demək iddiasındadırlar. Hesab edirəm ki, belələri xalqın və dövlətçiliyin vəkili deyillər. Lazımi məqamlarda xalq və dövlətçilik naminə dözümlülük nümayiş etdirə bilmirlər. Bir qrup hakimiyyət təmsilçisinin marağını qorumaqdan ötrü xalqı və dövlətçiliyi çox asanlıqla nəzərə almaya bilərlər".

AİDP sədri bildirdi ki, din problem deyil, əksinə problemin yaranma səbəblərini araşdırıb, onun müalicəsini təşkil edəndir: "Qafqaz Müsəlmanları İdarəsinin (QMİ) kolbasa, sosiska istehsalına hallal məhsul kimi müsbət rəy verməsinin tənqid olunması və bunları dinin problemi kimi təqdim etmək cılızlıqdır. Birincisi, yas mərasimlərini dəbdəbəli keçirənlər cəmiyyətin sıravi üzvləri deyil. Müşahidə etsək görərik ki, belələri elə iqtidar mənsublarının, parlamentdə təmsil olunanların arasındadır. QMİ-nin rəy verməsinə gəlincə, mən burada bir problem görmürəm. Problem ondadır ki, bu gün dindarlar halal məhsul tapmaqda çətinliklə üzləşiblər. Məncə bu məsələnin qabardılmasında hansısa qrupun biznes marağı mühum rol oynayıb. Görünür kimlərinsə istehsal etdiyi kolbasa, sosiska bazarda yaxşı getmədiyindən bu məqamı Milli Məclis səviyyəsində qabardıb və müzakirəsinə nail olmağa çalışıblar".

AİDP sədrinin sözlərinə görə, qəbristanlaqda yerlərin pulla satılması kimi, cəmiyyətdə narahatlıq yaradan problemin Milli Məclisdə qaldırılması və bunun dinin problemi kimi təqdim olunması yanlışdır. "Bu əslində dinsizlik problemidir. Yerlərin pulla satılması, qəbristanlıqlarda dəbdəbəli baş daşlarının qoyulması dinin problemi ola bilməz və dini təlim-tərbiyə almış insanlar bu prosesə razılıq verməzlər və vermirlər də."

T.Abbaslı digər tərəfdən onu da vurğuladı ki, Neft Akademiyasında baş verən qanlı olay fonunda, eləcədə məscidlərin dağıdılması, bağlanması kimi məsələlər cəmiyyətin yaddaşında həkk olunduğu bir vaxtda bu cür ünvanlı problemlərin qaldırılması və dindarlara minnət vurulması zəiflikdir: "Özlərinin hakimiyyət maraqları naminə, xalqın və dövlətçiliyin maraqlarını arxa plana keçirmək, orta bir xətt tapmamaq indiki halda cinayət hesab olunmalıdır. Hesab edirəm ki, mənsubların etdiyi bu hərəkətlər xalqa, dövlətçiliyə zərbədir, torpaqların azad olunması kimi məsələlərdə ruhiyyənin zəiflədilməsinə xidmət edir".

T.Abbaslı sonda onu da qeyd etdi ki, son vaxtlar bu cür məsələlərin tez-tez hallandırılması, belə ki, məscidlərə təzyiq göstərilməsi, dini mərasimlərlə bağlı parlament səviyyəsində mənfi fikrlər səsələndirilməsi keçmişimizlə bu günümüzün bağlantısı olan məqəddəs məkan və məqamlara səlib yürüşünün tərkib hissəsi kimi qiymətləndirilə bilər.