Şəhidlər Xiyabanının yaxınlığında yerləşən "Şəhidlər Camisi"nin bağlanması birmənalı qarşılanmadı. Qeyd edək ki, 1992-ci ildə Türkiyənin Diyanət İşləri Bakanlığı tərəfindən inşa olunan məscid təmir adı ilə bağlanılıb. "Ekspress"in əməkdaşı ilə söhbətində Türkiyənin Azərbaycandakı səfirliyinin din işləri üzrə müşaviri Müzəffər Şahin də bunu təsdiqləyib.

- "Şəhidlər Camisi"nin bağlanmasına səbəb nə idi?

- Məscidin bağlanması təmirlə bağlıdır. Məscid təmirə müşavirlik tərəfindən dayandırılıb. Məscidin qübbələrinin xaricində çatlar var. Dolayısıyla məscidin bağlanması uyğunsuz vaxta təsadüf etdi.

- Məscidin nə vaxt açılması nəzərdə tutulub?

- Onu dəqiq bilmirəm. İnşallah, önümüzdəki qısa müddətdə məscidin əvvəlki vəziyyətinə qayıdacağına ümid edirəm.

- Ümumiyyətlə, Azərbaycanda məscidlərin fəaliyyəti sizi qane edirmi?

- Azərbaycanda məscidlərə nəzarət edilməsi fərqlidir. Burda məscidlərə nəzarəti Qafqaz Müsəlmanları İdarəsi həyata keçirir. Məscidlərdə səlahiyyətli şəxslər əmək haqqı almırlar. Həmin şəxslər din xidmətlərini öz imkanları hesabına həyata keçirirlər və belə olan halda məscidə rəhbərlik edən şəxslərin öz işlərini nə qədər "təmiz" həyata keçirəcəklərini bilmirəm!

- Dövlətin dini işlərə nəzarətini necə qiymətləndirirsiniz?

- "Dini etiqat azadlığı haqqında" qanunla tanışam. Eyni zamanda Dini Qurumlarla İş üzrə Dövlət Komitəsinin fəaliyyətini öyrənmişəm. Türkiyə ilə fərqli yanaşdıqda bəzi boşluqlar görürəm. Ancaq Dövlət Komitəsi bu işlərlə bağlı ciddi fəaliyyət göstərir. Belə işlər vaxt tələb edir. Bundan başqa dini təhsil də çox önəmlidir. Türkiyədə Dini İşlər Komitəsinin nəzarətində Quran kursları keçirilir. Bu kurslar nəzarət altında, sistemli şəkildə həyata keçirilir.

- Yeri gəlmişkən, dini təhsillə bağlı fikirlərinizi də bilmək istərdik...

- Bildiyiniz kimi, burdakı məsciddə icmalar vasitəsilə dini dərslər keçirilir. Bildiyim qədər Dövlət Komitəsi bu sahəyə ciddi nəzarət etməyə başlayıb və artıq istənilən adam din dərsləri verə bilmir. Türkiyədə də belədir.

- Təhsil ocaqlarında dini dərslərin keçirilməsinə necə yanaşırsınız?

- Türkiyədə təhsil ocaqlarında din və əxlaq dərsləri keçirilir. Dolayısıyla böyük bir boşluğu doldurur. Əgər dini təriqətlər cəmiyyətdəki sabitlyi pozursa, birlik-bərabərliyə zərər verirsə, bunların fəaliyyətinə imkan verilməməsi lazımdır.

- Türkiyə ilə Azərbaycanın dini sahədəki əlaqələri nə nə yerdədir?

- Türkiyənin Diyanət İşləri Bakanlağı ilə Qafqaz Müsəlmanları İdarəsi, Dini Qurumlarala İş üzrə Dövlət Komitəsi daima əlaqədədirlər. Mayın 12-də İstanbulda Avrasiya İslam Şurası keçiriləcək. Həm Hidayət Orucov, həm də Şeyx həzrətləri həmin tədbirdə iştirak edəcək. Bundan başqa təcrübə mübadiləsi də həyata keçirilir.