Yevlax sakinləri şəhər ərazisində fəaliyyət göstərən "Cümə" məscidinin sökülərək, yerində ticarət obyekti tikilməsinin planlaşdırıldığını iddia edirlər. Onlar Lent.az-a müraciət edərək, Heydər Əliyev prospektində yerləşən "Cümə" məscidinin hasarlarının söküldüyün, kanalizasiya sisteminin dağıdıldığını deyiblər.

Onların sözlərinə görə, şəhərdə yeganə məscid olan ibadət ocağı 1989-cu ildə tikilib: "Məscid bu günə kimi fəaliyyət göstərib. Naməlum şəxslər məscidi söküb yerində obyekt tikmək istəyirlər. Bununla bağlı aksiya keçirdik, bizi tutub, polis şöbəsinə apardılar. Orada bildirdilər ki, guya biz hər hansı bir çevriliş həyata keçirtmək istəyirik. Bir neçə saatdan sonra isə buraxdılar".

Sakinlər məsələ ilə bağlı Yevlax şəhər İcra Hakimiyyətinə, Qafqaz Müsəlmanları İdarəsinin sədri Hacı Allahşükür Paşazadəyəvə və Dini Qurumlarla İş üzrə Dövlət Komitəsinin sədri Hidayət Orucova müraciət etdiklərini söyləyiblər: "Rayonun icra nümayəndəsi bildirdi ki, həmin obyekt tikilməlidir. Lakin bu gün Hacı Allahşükür Paşazadə məscidin axundu Hacı Namiq Əliyev zəng edərək, məsələnin nəzarətə götürdüyünü deyib".

Şəhər sakinləri həmin ərazini kimin aldığını dəqiq bilməsələr də, tikilən obyektin ya restoran ya da aptek olacağını deyiblər.

Məsələyə aydınlıq gətirmək üçün Qafqaz Müsəlmanları İdarəsi ilə əlaqə saxladıq. İdarənin mətbuat xidmətindən faktı təsdiqləyərək, problemin aradan qalxması üçün tədbirlərin görüləcəyini bildirdilər: "Şeyx oranın axundu ilə əlaqə saxlayıb. Bütün tədbirlərin görülməsi üçün göstərişlər verilib. İnşallah ki, məscid sökülməz".

Yevlax şəhər İcra Hakimiyyətinin İctimaiyyətlə Əlaqələr Şöbəsinin rəhbəri Hümbət Əhmədov isə xəbəri təkzib edib: "Həmin tikili məscidin ərazisinə düşmür. Bu gün Qafqaz Müsəlmanları İdarəsindən də gəlib baxdılar. Elə bir şey yoxdur".