Məhəmməd Peyğəmbərinin (s.ə.s.) mübarək mövludu münasibətilə Azərbaycanda ikinci dəfədir ki elmi-intellektual "Mövlud olimpiadası" keçirilib. Tədbir Dini Etiqad və Vicdan Azadlıqlarının Müdafiə Mərkəzi (DEVAMM), İcərişəhər "Cümə" məscidinin dini icması və İmam Sadiq (ə) adına İslam Maarifi Akademiyasının təşəbbüsü, "Dəyərlər" AİN-in isə informasiya dəstəyi ilə baş tutub.

Olimpiada "Hyatt Regency" otelinin "Quba" zalında start götürüb. Olimpiadanı açıq elan edən İcərişəhər "Cümə" məsçidi dini icmasının imam-camaatı, DEVAMM sədri Hacı İlqar İbrahimoğlu intellektual bilik yarışının iştirakçılarını salamlayaraq onları, Azərbaycan xalqını və həmçinin bütün dünya müsəlmanlarını İslam Peyğəmbəri (s) və İmam Cəfər Sadiqin (ə) mövludu, habelə "Vəhdət" həftəsi münasibətilə təbrik edib. Yarışın şərtləri və qaydalarını iştirakçıların diqqətinə çatdıraraq hamıya uğurlar arzulayıb. Sonra yarışının sualları iştirakçılara paylanıb.

Münsiflər heyətinin qərarı ilə Nəcibə xanım Allahverdi və Kəmalə xanım Yusifova hərəyə 49 xal toplayaraq 135 iştirakçı arasında 2-3 yerləri bölüşdürüblər. Leyla Abbasova isə 50 xalla qalib elan olunub. Hər 3 yerin sahibinə mükafat olaraq kompyuterlər təqdim edilib.

Olimpiada qurtardıqdan sonra böyük və əzəmətli mövlud bayramı keçirilib. 1000-ə yaxın qonağın qatıldığı məclisdə gözəl ifalar, surudlar, şeirlər səslənib. Sonda "Dəyərlər" Dini Jurnalistika məktəbinin dinləyiciləri arasında müsabiqə keçirilib. Müsabiqədə Mətləb Həmzəli qalib olub.