Azərbaycan paytaxtında məsciddən oğurluq etməkdə təqsirləndirilən futbolçu həbs edilib. Bakı şəhər Baş Polis İdarəsindən verilən məlumata görə, oğurluq hadisəsi Yasamal rayonu ərazisində yerləşən "İlahiyyat" məscidində baş verib.

Yasamal rayon Polis İdarəsinə sözügedən məsciddə oğurluq hadisəsinin olması barədə məlumat daxil olub. Daxil olan məlumat əsasında Yasamal rayon Polis İdarəsinin 28-ci Polis Bölməsi əməkdaşlarının həyata keçirdiyi əməliyyat-axtarış tədbirləri nəticəsində hadisədə şübhəli bilinən, 1981-il təvəllüdlü Mirzəyev Elmar Nağı oğlu tutularaq məsuliyyətə cəlb edilib. E. Mirzəyev istintaqa verdiyi ifadəsində Türkiyənin "Zeytunburnuspor" və Bakının müxtəlif futbol klublarında çıxış etdiyini bildirib. Təqsirləndirilən şəxs bir neçə ildir narkomaniyaya düçar olduğunu, narkotik maddə almağa imkanı olmadığı üçün oğurluq etmək qərarına gəldiyini bildirib.

E. Mirzəyev "İlahiyyat" məscidinə namaz qılmağa gələnlərin gödəkçələrini oğurlamağa başlayıb. Sonuncu dəfə isə məscidə namaz qılmağa gələn Rzayev Murad Əzizağa oğlunun cibində mobil telefon, sənədlər və 5 manat pul olan gödəkçəsini oğurlayıb. Özünün dediyinə görə, sözügedən məsciddən cəmi 30-40 manata yaxın pul oğurlayıb. Onun akademik Qarayev küçəsində yaşadığı mənzilə baxış keçirilərkən məsciddən oğurladığı 4 ədəd mobil telefon və gödəkçə aşkar edilərək götürülüb. Araşdırmalar nəticəsitndə Elmar Mirzəyevin dəfələrlə həmin məsciddən oğurluq etdiyi sübuta yetirilib.

Faktla bağlı Yasamal rayon Polis İdarəsinin İstintaq Şöbəsində Cinayət Məcəlləsinin 177-ci (oğurluq) və 234-cü (qanunsuz olaraq narkotik vasitələrin və psixotrop maddələrin qəbulu və satışı ilə məşğul olma) maddəsi ilə cinayət işi başlanıb. Hazırda istintaq hərəkətləri davam etdirilir. // APA