"Təyyarə ilə həyata keçirilən Həcc ziyarətində böyük çətinliklərlə qarşılaşırıq. Bakıdan Məkkəyə birbaşa təyyarə reysi olmadığından bu yol bizə real qiymətlərdən təxminən 30-40 faiz baha başa gəlir. Biz isə məcbur olub depozit götürürük. Hazırda təyyarə reysləri üçün banka 612 min dollar borcumuz var. Həmin pulları banka qaytarmaq lazımdır". Bu sözləri Həcc ziyarətinin yekunları ilə bağlı APA-ya verdiyi açıqlamada Qafqaz Müsəlmanları İdarəsinin (QMİ) sədri Hacı Allahşükür Paşazadə deyib. Şeyxin sözlərinə görə, ötən dəfə 1 nəfərin təyyarə bileti 2600-2700 dollara başa gəlib. Yaranan çətinliyi dövlət başçısının göstərdiyi kömək sayəsində aradan qaldırmaq mümkün olub. A.Paşazadə hazırda problemdən çıxış yolu axtardıqlarını deyib: "Növbəti dəfə məcbur olub İran, Suriya yaxud da Səudiyyə Ərəbistanı ilə müqavilə bağlayacağıq ki, onların vasitəsi ilə uçuşları həyata keçirə bilək. Bu ölkələrdən birinin xidmətlərindən istifadə edə bilsək, depozit götürməyə ehtiyac olmayacaq, bundan başqa bəzi əlavə xərclər də ortaya çıxmayacaq".

A.Paşazadə zəvvarların artıq vaxt itirmələrinə səbəb olan bəzi çatışmazlıqların da aradan qaldırılması istiqamətində iş aparıldığını bildirib: "Səudiyyə Ərəbistanı Krallığı Həcc ziyarətinə gələn 1 zəvvar üçün təxminən 280 dollar məbləğində sığorta pulu alır. Biz istəyirik ki, zəvvarlar həmin sığorta pulunu bəri başdan özləri banklara ödəsinlər. Bu baş tutsa, sərhəd keçid məntəqələrində artıq gözləmələr də aradan qalxacaq". QMİ sədri deyib ki, həlli vacib məsələlərdən biri də avtobuslarla bağlıdır: "Bu il avtobuslarda yaranan çətinliklər məndə şəkər xəstəliyinin əmələ gəlməsinə səbəb olub. Hansısa avtobusda kiçik problem yarandığını eşidəndə, həmin an səhhətim pisləşirdi. Bilirsiniz, Azərbaycanın elə potensialı yoxdur ki, bu işə birdəfəlik 100 avtobus ayıra bilsin. Dövlətin ayırdığı avtobuslar az sayda olur, kənardan gətiriləndə isə baha başa gəlir. Zəvvar aparan hər avtobusda yerlərin yarısından istifadə etməyimizə baxmayaraq, sürücülər bizdən bütün yerlərin pulunu alırlar. Əgər avtobus problemini həll edə bilsək, zəvvarlarımız heç bir çətinliklə üzləşməyəcəklər". QMİ sədri bəzi problemlərin yaranmasını isə azərbaycanlı zəvvarların dözümsüzlüyü ilə əlaqələndirib. Onun sözlərinə görə, çox vaxt azərbaycanlı zəvvarların mənəvi hazırlıq səviyyəsi də aşağı olur: "Burada söhbət əqidədən gedir. Məsələn, İranda hər yüz adama bir rəhbər təyin edirlər, mən isə hər iyirmi adama bir başçı qoymuşdum. Bizimkilər sözə baxmır, deyiləni eləmirlər. Məsələn, zəvvara deyəndə ki, ehramın altından heç bir şey geyinmək olmaz, bunu başa düşmürlər. Adam var ki, ehramı cins şalvarla geyinir. İnanın ki, hətta özbəklər və tatarlar azərbaycanlılara nisbətən ziyarətə daha hazırlıqlı və dözümlü olurlar". Şeyx, gələn il Həcc ziyarətinə İraq ərazisindən keçməklə gediləcəyini də istisna etməyib. Onun sözlərinə görə, hazırda bu sahədə danışıqlar aparılır: "İstəyirik ki, gələn il zəvvarlar Həcc ziyarətinə Kərbəla yolu ilə getsinlər. Ancaq həmin vaxt İraqdakı ictimai sabitliyi də nəzərə alacağıq. Onlar bizim təhlükəsizliyimizə təminat versələr, gələn il zəvvarlar ziyarətə İraqdan gedəcəklər". QMİ sədri zəvvarların Həcc ziyarəti zamanı Səudiyyə Ərəbistanı ərazisində qarşıladıqları çətinliklərə də toxunub. O bildirib ki, müqəddəs yerlərin ziyarəti zamanı sıxlığın yaranmasının səbəbi bəzi dövlətlərin ayrılan kvota ilə kifayətlənməməsidir: "Hər dövlətə Həcc ziyarətində iştirakla bağlı kvota qoyulub. Həmin kvotadan kənara çıxmaq olmaz. Buna baxmayaraq, İran, Türkiyə və İndoneziya kimi dövlətlər nəzərdə tutulandan çox adam aparırlar. Bu isə Səudiyyə Ərəbistanını çətinliklər qarşısında qoyur. Bilirsiniz, Səudiyyə Ərəbistanı Krallığı çox varlı dövlətdir və zəvvarların qarşılaşdıqları çətinliklər qısa müddətdə aradan qaldırıla bilər. Lakin bu ziyarət zamanı insanın çəkdiyi əziyyətlərin savabı böyükdür. Əgər müasir standartlara uyğun şərait yaradılarsa, onda hansısa istirahət düşərgəsinə getməklə bu ziyarətə getməyin arasında fərq olmaz. Mən özüm ziyarət etdiyim zaman bu çətinliklər çəkməyi çox istəyirəm". A.Paşazadə, həmçinin müqəddəs ziyarətgahlarda aparılan elementar dəyişikliklərin və müasirləşdirmənin müsəlmanların ciddi narazılığına səbəb olduğunu deyib: "Bu ziyarətgahlarda müasirləşdirmə aparmaq namazı azərbaycanca qılmaq istəyi kimi bir şeydir. Söhbət burada mahiyyətin və orijinallığının qorunub saxlanmasından gedir".